വി എസിന്റെ പേര്​ വിവാദങ്ങളിൽ 
കുരുക്കിയിടാൻ ശ്രമം: എം സ്വരാജ്​

കഞ്ഞിക്കുഴി

ചിതയുടെ ചൂട്​ വിട്ടുപോകും മുമ്പ്​ വി എസ്​ അച്യുതാനന്ദനെ ആക്രമിക്കാൻ ചില മാധ്യമങ്ങളുടെ നേതൃത്വത്തിൽ നീക്കം നടക്കുന്നതായി സിപിഐ എം സംസ്ഥാന സെക്രട്ടറിയറ്റംഗം എം സ്വരാജ്​ പറഞ്ഞു. സിപിഐ എം കഞ്ഞിക്കുഴി ഏരിയ കമ്മിറ്റി സംഘടിപ്പിച്ച വി എസ് അച്യുതാനന്ദൻ അനുസ്​മരണ സമ്മേളനം പി പി സ്വാതന്ത്ര്യം സ്​മാരക കമ്യൂണിറ്റി ഹാളിൽ ഉദ്ഘാടനംചെയ്യുകയായിരുന്നു അദ്ദേഹം.

വി എസിന്റെ പേര്​ വിവാദങ്ങളിൽ കുരുക്കിയിടാനാണ്​ നീക്കം. അത്​ അദ്ദേഹത്തോടുള്ള അനാദരവാണ്​, മനുഷ്യത്വമില്ലായ്​മയാണ്​. വി എസിനെ വിയോജിപ്പുകളുടെയും വിഭാഗീയതയുടെയും പ്രതീകമായി തളച്ചിടാനാണ്​ ശ്രമം.

രാഷ്​ട്രീയഭേദമന്യേ എല്ലാവരുടെയും സ്​നേഹാദരങ്ങൾക്ക്​ അർഹനായ, ത്യാഗനിർഭരവും സാഹസികവുമായ രാഷ്​ട്രീയജീവിതത്തിന്​ ഉടമയായ വി എസിനെ ആക്രമിക്കുന്ന ശൈലി മാധ്യമങ്ങൾ അവസാനിപ്പിക്കണം. അതിന്​ ഏതെല്ലാം കൽപ്പിതകഥകളാണ്​ പ്രചരിപ്പിക്കുന്നത്​. ആരോഗ്യവാനായിരുന്ന സമയത്ത്​ നേരിട്ട് മറുപടി പറഞ്ഞവസാനിപ്പിച്ച കാര്യങ്ങൾവരെ വി എസ്​ ജീവിച്ചിരിക്കുന്നില്ല എന്ന ധൈര്യത്തിൽ ആക്രമിക്കാൻ ഉപയോഗിക്കുന്നു. കേരളം ആദരിക്കുന്ന വ്യക്തിത്വത്തെ വിവാദങ്ങളുടെ പുകമറയിൽ നിർത്താനുള്ള ഹീനമായ നീക്കമാണിത്​. അത്​ ഇ‍ൗ നാട്​ അംഗീകരിക്കില്ല. എല്ലാക്കാലവും കേരളത്തിന്റെയും ഇടതുപക്ഷ പ്രസ്ഥാനങ്ങളുടെയും ചരിത്രത്തിലും സാധാരണക്കാരുടെ ഹൃദയത്തിലും സർവപ്രതാപത്തോടെ വി എസ്​ നിലനിൽക്കും. വിഎസിന്റെ തെളിമയാർന്ന രാഷ്​ട്രീയം വരുംനാളുകളിലും ഇ‍ൗ നാടിന്​ വഴികാട്ടുമെന്നും അദ്ദേഹം പറഞ്ഞു.