തദ്ദേശ തെരഞ്ഞെടുപ്പ്‌; 1.08 ലക്ഷം പേർ നാമനിർദേശ പത്രിക നൽകി

തിരുവനന്തപുരം: തദ്ദേശ തെരഞ്ഞെടുപ്പിൽ മത്സരിക്കാൻ നാമനിർദേശ പത്രിക നൽകിയത്‌ 1,08,580 സ്ഥാനാർഥികൾ. ഇത്രയും പേർ സംസ്ഥാനത്തെ തദ്ദേശ സ്ഥാപനങ്ങളിലെ 23,576 വാർഡുകളിലേക്കായി 1,64,427 പത്രികകൾ നൽകി. 51,352 പുരുഷന്മാരും 57,227 വനിതകളും ഒരു ട്രാൻസ്‌ജെൻഡർ സ്ഥാനാർഥിയുമാണ്‌ പത്രിക സമർപ്പിച്ചത്‌. അന്തിമ കണക്കിൽ ചെറിയ വ്യത്യാസം വന്നേക്കാം.

പത്രിക സമർപ്പണത്തിനുള്ള അവസാന ദിവസമായ വെള്ളിയാഴ്‌ച 45,652 പേരാണ്‌ പത്രിക നൽകിയത്‌. 22,725 പുരുഷന്മാരും 22,927 വനിതകളും ഉൾപ്പെടുന്നു. നാമനിർദേശപത്രികകളുടെ സൂക്ഷ്മപരിശോധന ശനിയാഴ്‌ച നടക്കും.

ഇന്ന് വൈകുന്നേരം മൂന്നു മണി വരെ ലഭിച്ചിട്ടുള്ള എല്ലാ നാമനിർദ്ദേശപത്രികകളും ഓരോന്നായി സൂക്ഷ്‌മപരിശോധന നടത്തും. ഒരു സ്ഥാനാർഥിയോ, സ്ഥാനാർത്ഥിക്കു വേണ്ടിയോ ഒന്നിലധികം നാമനിർദ്ദേശപത്രിക സമർപ്പിച്ചിട്ടുണ്ടെങ്കിൽ അവയെല്ലാം ഒരുമിച്ചെടുത്തായിരിക്കും സൂക്ഷ്‌മപരിശോധന ചെയ്യുക. സൂക്ഷ്മപരിശോധനയ്ക്ക് ശേഷം സ്വീകരിക്കപ്പെട്ട പത്രികകൾ സമർപ്പിച്ച സ്ഥാനാർത്ഥികളുടെ പട്ടിക റിട്ടേണിംഗ് ഓഫീസർ തയ്യാറാക്കി പ്രസിദ്ധീകരിക്കും.

സ്ഥാനാർഥിത്വം പിൻവലിക്കാനുള്ള അവസാന തീയതി 24 ആണ്‌. അന്ന്‌ അന്തിമ സ്ഥാനാർഥി പട്ടികയാകും.