കെെറ്റിന്റെ റോബോട്ടിക്ക് വിദ്യാഭ്യാസത്തിന് പ്രശംസയുമായി ദെെനിക് ഭാസ്ക്കർ

തിരുവനന്തപുരം: കേരളത്തിൽ പൊതുവിദ്യാഭ്യാസ വകുപ്പ് KITE(കൈറ്റ്)(കേരള ഇൻഫ്രാസ്ട്രക്ചർ ആൻഡ് ടെക്നോളജി ഫോർ എഡ്യൂക്കേഷൻ) വഴി നടപ്പാക്കുന്ന റോബോട്ടിക് വിദ്യാഭ്യാസത്തെ പ്രശംസിച്ച് ഹിന്ദി ദിനപത്രം ദെെനിക് ഭാസ്കർ. റോൾ മോഡൽ എന്ന രൂപത്തിലാണ് ‌ഇന്ന് ഒന്നാം പേജിൽ ദെെനിക് ഭാസ്കർ വാര്‍ത്ത നല്‍കിയിരിക്കുന്നത്. കേരളം നടപ്പിലാക്കുന്ന റോബോട്ടിക് വിദ്യാഭ്യാസത്തെ വലിയ രീതിയിൽ മാധ്യമം ഉയര്‍ത്തിക്കാണിക്കുന്നു.

ഹിന്ദിക്ക് പുറമേ മറാഠി, ഗുജറാത്തി ഭാഷകളിലും പ്രാധാന്യത്തോടെ ഈ വാർത്ത ദെെനിക് പ്രസിദ്ധീകരിച്ചുണ്ട്. ഇന്ത്യയിലെ ഏറ്റവും കൂടുതൽ സർക്കുലേഷൻ ഉള്ള ദിനപത്രം കൂടിയാണ് ദെെനിക ഭാസ്കർ.
കൈറ്റ്
കേരള സർക്കാരിൻ്റെ കീഴിൽ വിദ്യാഭ്യാസ വകുപ്പിൽ, വിദ്യാലയങ്ങളിൽ ഐസിറ്റി പ്രവർത്തനങ്ങൾ ആവിഷ്കരിച്ച് നടപ്പാക്കുന്നതിനായി ആരംഭിച്ച പദ്ധതിയാണ് കൈറ്റ് (KITE). 2002 ലാണ് പദ്ധതി ആരംഭിച്ചത്. 2017 വരെ ഐടി @ സ്കൂൾ എന്ന പേരിലാണ് ഈ പദ്ധതി അറിയപ്പെട്ടിരുന്നത്.

ഡിജിറ്റൽ സാങ്കേതിക വിദ്യയുടെ പ്രയോജനം ക്ലാസ് റൂം പഠന പ്രവർത്തനങ്ങളിൽ എത്തിക്കുക എന്ന ലക്ഷ്യത്തോടെയാണ് പദ്ധതി ആരംഭിച്ചത്. തുടക്കത്തിൽ ഹൈസ്കൂൾ വിഭാഗത്തിലാണ് നടപ്പാക്കിയതെങ്കിലും ഇന്ന് ഒന്നാം ക്ലാസുമുതൽ പന്ത്രണ്ടാം ക്ലാസുവരെ പദ്ധതി നടപ്പാക്കി വരുന്നു. കേരള സർക്കാർ നടപ്പാക്കുന്ന പൊതു വിദ്യാഭ്യാസ സംരക്ഷണ യജ്ഞത്തിൻറെ ഭാഗമായുള്ള ഹൈടെക് വിദ്യാഭ്യാസ പദ്ധതിയുടെ നടത്തിപ്പ് ചുമതലയും കൈറ്റിനാണ്.

അധ്യാപക പരിശീലനം, ഐസിറ്റി പാഠപുസ്തകം തയ്യാറാക്കൽ, ഐസിറ്റി പരീക്ഷ, വിദ്യാഭ്യാസ വകുപ്പിൻറെ പ്രധാന വെബ്സൈറ്റുകളുടേയും പോർട്ടലുകളുടേയും പരിപാലനം തുടങ്ങിയവ ഇവയുടെ പ്രധാന പ്രവർത്തനങ്ങളാണ്. ഹൈടെക്ക് ക്ലാസ് മുറിയിലെ പഠന പ്രവർത്തനങ്ങൾക്ക് ആവശ്യമായ സഹായം ഒരുക്കുന്നതിനായി സമഗ്ര എന്ന പേരിലും ഒരു പോർട്ടൽ ആരംഭിച്ചിട്ടുണ്ട്.