കൈനകരി അനിത കൊലക്കേസ്; രണ്ടാം പ്രതി രജനിയ്ക്ക് വധശിക്ഷ

ആലപ്പുഴ : കൈനകരി ​അനിത കൊലക്കേസിൽ രണ്ടാം പ്രതി കൈനകരി തോട്ടുവാത്തല പടിഞ്ഞാറ് പതിശേരി വീട്ടിൽ രജനി(38)യ്ക്ക് വധശിക്ഷ. ആലപ്പുഴ അഡീഷണൽ ജില്ലാ സെഷൻസ് കോടതി (മൂന്ന്‌) ആണ് രജനിയുടെ ശിക്ഷ വിധിച്ചത്. ഒന്നാം പ്രതി പ്രബീഷിനെയും മുമ്പ് കോടതി വധശിക്ഷയ്ക്ക് വിധിച്ചിരുന്നു. പ്രബീഷിന്റെ വിധി പറഞ്ഞ ദിവസം മയക്കുമരുന്ന്‌ കേസിൽ ഒഡീഷയിലെ ജയിലിൽ റിമാൻഡിലായതിനാൽ രജനി ഹാജരായിരുന്നില്ല. ജാമ്യത്തിലായിരുന്ന പ്രതി വിചാരണ ഘട്ടത്തിൽ കഞ്ചാവുമായി ഒഡീഷയിൽ പിടിയിലാകുകയായിരുന്നു. തുടർന്ന് ഓൺലൈൻ വഴി വിചാരണ പൂർത്തിയാക്കി. ഇന്ന് രജനിയെ കോടതിയിൽ ഹാജരാക്കി.

2021 ജൂലൈ ഒമ്പതിന്‌ രാത്രി 9:30 നാണ്‌ പുന്നപ്ര തെക്കേമഠം വീട്ടിൽ അനിത കൊല്ലപ്പെട്ടത്‌. പ്രതികളായ പ്രബീഷും രജനിയും ഒന്നിച്ചായിരുന്നു താമസം. ഇതിനിടെ പാലക്കാടുവച്ച് പരിചയപ്പെട്ട അനിതയുമായി പ്രബീഷ് പ്രണയത്തിലായി. ഗർഭിണിയായതോടെ വിവാഹം ചെയ്യണമെന്ന് ആവശ്യപ്പെട്ടെങ്കിലും പ്രബീഷ് തയ്യാറായില്ല. ഗർഭം ഒഴിവാക്കാൻ നടത്തിയ ശ്രമങ്ങൾ പരാജയപ്പെട്ടതോടെയാണ്‌ പ്രബീഷും രജനിയും ചേർന്ന്‌ അനിതയെ കൊല്ലാൻ തീരുമാനിച്ചത്‌.

അനിതയെ തോട്ടുവാത്തലയിലെ രജനിയുടെ വീട്ടിലേക്ക് വിളിച്ചുവരുത്തി ആക്രമിച്ചു. ബോധം പോയ അനിതയെ ഫൈബർവള്ളത്തിൽ കയറ്റി പള്ളാത്തുരുത്തി അരയൻതോടിന് സമീപം പൂക്കൈതയാറ്റിൽ തള്ളുകയായിരുന്നു. 112 സാക്ഷികളുണ്ടായിരുന്ന കേസിൽ 82 പേരെ വിസ്തരിച്ചു. 131 രേഖകളും ഫൈബർ വള്ളമടക്കം 53 തൊണ്ടിമുതലുകളും പ്രോസിക്യൂഷൻ ഹാജരാക്കി. പ്രതി രജനിയുടെ അമ്മയും പ്രോസിക്യൂഷന് അനുകൂലമായി സാക്ഷി പറഞ്ഞു.