ജിഎസ്‌ടിയിലേക്കുള്ള മാറ്റം ; കഴിഞ്ഞ സാമ്പത്തികവര്‍ഷം 
കേരളത്തിന്‌ നഷ്ടം 27,000 കോടി

ന്യൂഡൽഹി

ജിഎസ്‌ടിയിലേക്ക്‌ മാറിയതുമൂലം കേരളത്തിനുണ്ടായ വരുമാനനഷ്ടം കഴിഞ്ഞ സാമ്പത്തികവർഷം മാത്രം 27000 കോടിയിലേറെ രൂപയാണെന്ന്‌ ധനമന്ത്രി കെ എൻ ബാലഗോപാൽ ജിഎസ്‌ടി ക‍ൗൺസിൽ യോഗത്തിൽ പറഞ്ഞു. 2024–25ൽ കേരളത്തിന്റെ ജിഎസ്‌ടി വരുമാനം 32773 കോടി രൂപയാണ്‌. ജിഎസ്ടിക്ക്‌ മുമ്പുള്ള മൂല്യവർധിത നികുതി സമ്പ്രദായം നിലനിൽക്കുകയും കേരളത്തിന്റെ ഓരോ വർഷവുമുള്ള ശരാശരി നികുതിവർധനവ്‌ മാറ്റമില്ലാതെ തുടരുകയും ചെയ്‌തിരുന്നെങ്കിൽ 60377 കോടി രൂപ 2024–25ൽ കിട്ടുമായിരുന്നു. ജിഎസ്‌ടിയിലേക്ക്‌ മാറിയതിലൂടെ സംഭവിച്ച വരുമാനനഷ്ടം കഴിഞ്ഞ വർഷം മാത്രം 27604 കോടിയാണ്‌.

ജിഎസ്‌ടിയിലേക്ക്‌ മാറിയപ്പോൾ 14 ശതമാനം വാർഷികവളർച്ച കണക്കാക്കിയുള്ള വരുമാനമാണ്‌ കേന്ദ്രം ഉറപ്പുനൽകിയിരുന്നത്‌. ഇതുപ്രകാരമുള്ള വരുമാനം ലഭിക്കാത്ത സാഹചര്യത്തിൽ നഷ്ടം കേന്ദ്രം നികത്തുമായിരുന്നു. നിലവിൽ നഷ്ടപരിഹാര സംവിധാനമില്ല. ഇത്‌ തുടർന്നിരുന്നെങ്കിൽ 2024–25ൽ കേരളത്തിന്‌ ഏതാണ്ട്‌ 54000 കോടി രൂപയുടെ വരുമാനമുണ്ടാകുമായിരുന്നു. ഇ‍ൗ സ്ഥാനത്ത്‌ ജിഎസ്‌ടി വകയിൽ 32773 കോടി രൂപയാണ്‌ ലഭിച്ചത്‌. ജിഎസ്‌ടിക്ക്‌ മുന്പ്‌ സംസ്ഥാനത്തിന്റെ നികുതി വരുമാനം ആഭ്യന്തര ഉൽപ്പാദനത്തിന്റെ മൂന്ന്‌ ശതമാനമായിരുന്നു. എന്നാൽ നിലവിൽ ഇത്‌ 2.69 ശതമാനമായി കുറഞ്ഞു.

വരുമാനനഷ്ടം നികത്തുന്നതിനായി സെസുകൾ ചുമത്താൻ സംസ്ഥാനങ്ങൾക്കുകൂടി അനുമതി നൽകണം. ജിഎസ്‌ടി വരുമാനത്തിൽ 60 ശതമാനം സംസ്ഥാനങ്ങൾക്കും 40 ശതമാനം കേന്ദ്രത്തിനും എന്ന നിലയിൽ വരുമാനം പങ്കുവെയ്‌ക്കൽ അനുപാതം മാറ്റണം. ആഡംബര ഉൽപ്പന്നങ്ങൾക്ക്‌ ഉയർന്ന തീരുവ ചുമത്തണം– ബാലഗോപാൽ പറഞ്ഞു.