മുനമ്പത്തേത്‌ വിൽപ്പനാവകാശമുള്ള വഖഫ് ഭൂമി; വാദം ആവർത്തിച്ച്‌ ഫറൂഖ് കോളേജ്
കാക്കനാട്
മുനമ്പം ഭൂമി സാധാരണ വഖഫിന്റെ പരിധിയിൽ വരില്ലെന്ന നിലപാട്‌ ജുഡീഷ്യൽ കമീഷനുമുന്നിൽ ആവർത്തിച്ച്‌ കോഴിക്കോട്‌ ഫറൂഖ് കോളേജ്. ക്രയവിക്രയ സ്വാതന്ത്ര്യത്തോടെ വഖഫായി കൈമാറുന്നു എന്നാണ് ആധാരത്തിലുള്ളതെന്നും സംസ്ഥാന സർക്കാർ നിയോഗിച്ച ജസ്റ്റിസ് സി എൻ രാമചന്ദ്രൻനായർ കമീഷൻ കലക്ടറേറ്റിൽ നടത്തിയ ആദ്യ ഹിയറിങ്ങിൽ കോളേജ് അധികൃതർ ബോധിപ്പിച്ചു.
വഖഫ് എന്ന വാക്ക് രേഖപ്പെടുത്തിയിട്ടുണ്ടെങ്കിലും ഭൂമി കൈമാറ്റത്തിന്റെ വ്യവസ്ഥകളിൽ അത് ഇഷ്ടദാനമാണെന്ന് വ്യക്തമാണെന്ന്‌ ഫറൂഖ് കോളേജ് അഭിഭാഷകൻ മായിൻകുട്ടി മേത്തർ അറിയിച്ചു. വഖഫ് സ്ഥിരം കൈമാറ്റമാണെന്ന് അറിയാവുന്ന ഉടമ, ക്രയവിക്രയ അധികാരം നൽകിയതുതന്നെ ഇതിന് തെളിവാണ്‌. സമാന കേസുകളിൽ മുമ്പുണ്ടായ വിധികളും ഫറൂഖ് കോളേജ് ചൂണ്ടിക്കാട്ടി.
അതേസമയം, മുനമ്പത്തേത്‌ വഖഫ് ഭൂമിയാണെന്ന് വാദിച്ച്‌ വഖഫ് സംരക്ഷണസമിതിയും കമീഷന്‌ നിവേദനം നൽകി. വഖഫ് ഭൂമി വിൽപ്പനയ്‌ക്ക്‌ നിയമസാധുത ഇല്ലെന്നിരിക്കെ വിൽപ്പന നടത്തിയ ഫറൂഖ് കോളേജ് മാനേജ്മെന്റിൽനിന്ന്‌ ആ പണം ഈടാക്കി ഭൂമി വാങ്ങിയവരെ സർക്കാർ പുനരധിവസിപ്പിക്കണമെന്നാണ് നിവേദനത്തിലെ ആവശ്യം. വഖഫ് ബോർഡിന്റെ വാദം വെള്ളിയാഴ്ച നിശ്ചയിച്ചിരുന്നെങ്കിലും ബോർഡ് കൂടുതൽ സമയം തേടി.
എല്ലാ കക്ഷികളെയും വിശദമായി കേൾക്കുമെന്നും അടുത്തമാസം അവസാനത്തോടെ റിപ്പോർട്ട് സമർപ്പിക്കുമെന്നും മുനമ്പം കമീഷൻ ജസ്റ്റിസ് സി എൻ രാമചന്ദ്രൻനായർ പറഞ്ഞു. തുടർന്നുള്ള സിറ്റിങ് 15നും 22നും നടക്കും.
0 comments