കരുത്തോടെ മുന്നേറാൻ 'പുതുവഴികൾ'; നിർദേശങ്ങൾ അയക്കാൻ സംവിധാനവുമായി സിപിഐ എം

തിരുവനന്തപുരം: പുതിയ കാലത്ത്‌ പാർടി മുന്നോട്ടുവെക്കേണ്ട ആശയങ്ങളും പ്രവര്‍ത്തന പദ്ധതിയും എന്താകണമെന്നത്‌ സംബന്ധിച്ച്‌ അഭിപ്രായങ്ങളും നിർദേശങ്ങളും തേടാൻ സംവിധാവുമായി സിപിഐ എം. നാട്ടിലും വിദേശത്തുമുള്ള സിപിഐ എം അനുഭാവികളും അല്ലാത്തവരുമായ മുഴുവന്‍ മലയാളികൾക്കും നിര്‍ദേശങ്ങൾ സമർപ്പിക്കാമെന്ന് സംസ്ഥാന സെക്രട്ടറി എം വി ​ഗോവിന്ദൻ അറിയിച്ചു.

യുവാക്കള്‍, വിദ്യാര്‍ഥികള്‍, യുവതികള്‍, ട്രാന്‍സ്‌ ജന്‍ഡേഴ്‌സ്‌, തൊഴിലാളികള്‍ തുടങ്ങി എല്ലാ മേഖലയിലെ ജനങ്ങളെയും കേള്‍ക്കും. പ്രത്യേകിച്ച്‌ പുതുതലമുറയെ കേള്‍ക്കണം എന്നാണ്‌ പാര്‍ടി കണ്ടിരിക്കുന്നതെന്നും എം വി ​ഗോവിന്ദൻ വാർത്താസമ്മേളനത്തിൽ പറഞ്ഞു.

'പുതുവഴികള്‍' എന്ന പേരില്‍ ആരംഭിച്ച ഇമെയില്‍, വാട്ട്‌സാപ്പ്‌, വെബ്‌സൈറ്റ്‌, മൊബൈല്‍ ആപ്പ്‌ എന്നിവ വഴി നിര്‍ദേശങ്ങള്‍ സമര്‍പ്പിക്കാം. 7994777168 എന്ന വാട്ട്‌സാപ്പ്‌ നമ്പറും puthuvazhikal@gmail എന്ന മെയില്‍ ഐഡിയും ഇതിനായി ഉപയോഗപ്പെടുത്താം. ഇതിനായുള്ള വെബ്‌സൈറ്റും മൊബൈല്‍ ആപ്പും വരും ദിവസങ്ങളില്‍ തയ്യാറാവും.

ഈ നിര്‍ദേശങ്ങള്‍ കൂടി പരിഗണിച്ചാവും സിപിഐ എം ഭാവി പ്രവര്‍ത്തനങ്ങള്‍ക്കുള്ള കര്‍മപദ്ധതി തയ്യാറാക്കുക പാര്‍ടി സംഘടനാപരമായി കൂടുതല്‍ കരുത്താര്‍ജ്ജിക്കുന്നതിനുള്ള നടപടികളാണ്‌ സ്വീകരിക്കുകയെന്നും എം വി ​ഗോവിന്ദൻ പറഞ്ഞു.