എസ്ഐആറിൽ തിടുക്കം; മുഖ്യ തെരഞ്ഞെടുപ്പ് ഓഫീസറിന്റെ യോ​ഗത്തിൽ വിമർശനവുമായി സിപിഐ എം

തിരുവനന്തപുരം: പൊതുജനങ്ങളുടെ ആശങ്കകൾ പരിഹരിക്കാതെ തിടുക്കത്തിൽ തീവ്ര വോട്ടർ പട്ടിക പരിഷ്കരണം നടത്തുന്നതിനെ വിമർശിച്ച് സിപിഐ എം. ശനിയാഴ്ച മുഖ്യ തെരഞ്ഞെടുപ്പ് ഓഫീസർ രത്തൻ യു ഖേൽക്കർ വിളിച്ചുചേർത്ത സർവകക്ഷി യോ​ഗത്തിലാണ് ഈ വിഷയം ഉന്നയിച്ചത്. വിവേകശൂന്യമായ രീതിയിലാണ് സംസ്ഥാനത്ത് വോട്ടർ പട്ടിക പരിഷ്കരണം നടക്കുന്നതെന്ന് സിപിഐ എം വിമർശനം അറിയിച്ചു.

സിപിഐ എമ്മിനെ പ്രതിനിധീകരിച്ച് മുതിർന്ന നേതാവ് എം വിജയകുമാർ യോ​ഗത്തിൽ പങ്കെടുത്തു. ബൂത്ത് ലെവൽ ഓഫീസർമാർക്ക് (ബിഎൽഒ) അമിത സമ്മർദ്ദമുള്ളതായാണ് നിലവിലെ സാഹചര്യം വ്യക്തമാക്കുന്നതെന്ന് വിജയകുമാർ പറഞ്ഞു. വോട്ടർ പട്ടിക പരിഷ്കരണ ജോലികൾക്കിടെ ഒരു ബിഎൽഒ ആത്മഹത്യ ചെയ്തതും അഞ്ച് പേർ കുഴഞ്ഞുവീണതും അദ്ദേഹം ചൂണ്ടിക്കാട്ടി.

“ക്ഷമയോടെ വളരെ കൃത്യമായി പൂർത്തിയാക്കാൻ കഴിയുന്ന ഒരു നടപടിക്രമമാണ് വോട്ടർ പട്ടിക പരിഷ്കരണം. അത് ഇത്ര തിടുക്കത്തിൽ നടപ്പിലാക്കുന്നത് ദുഃഖകരമാണ്. എസ്ഐആർ നടത്തുന്നതിന്റെ നിയമസാധുത നിലവിൽ സുപ്രീംകോടതിയുടെ പരിഗണനയിലാണ്. ഇതുവരെ യാതൊരുവിധ ഇളവുകളും അനുവദിച്ചിട്ടുമില്ല“. യാതൊരു മാനുഷിക പരി​ഗണനയുമില്ലാതെ വോട്ടർപട്ടിക പരിഷ്കരണത്തിനായി തിടുക്കം കൂട്ടുന്ന നടപടി അംഗീകരിക്കാനാവില്ലെന്നും വിജയകുമാർ പറഞ്ഞു.

തെരഞ്ഞെടുപ്പ് കമീഷന്റെ മനോഭാവത്തെയും പൊതുജനങ്ങൾ നേരിടുന്ന ബുദ്ധിമുട്ടുകളോടുള്ള അവഗണനയെയും സിപിഐ എം അപലപിച്ചു. ബിജെപി ഒഴികെയുള്ള സംസ്ഥാനത്തെ രാഷ്ട്രീയ പാർടികളും സമാനമായ ആശങ്കകൾ ഉന്നയിച്ചു. പൂർത്തിയാക്കിയ എന്യൂമറേഷൻ ഫോംതിരികെ നൽകേണ്ട ഔദ്യോഗിക സമയപരിധി ഡിസംബർ 4 ആണ്. എന്നാൽ ഞായറാഴ്ചയ്ക്കം പൂർത്തിയക്കിയ ഫോമുകൾ തിരികെ നൽകാൻ ബി‌എൽ‌ഒമാരോട് ആവശ്യപ്പെട്ടിട്ടുണ്ടെന്നതും വിവധ പാർടികൾ ചൂണ്ടിക്കാട്ടി.

തിടുക്കപ്പെട്ട് എസ്ഐആർ നടപ്പിലാക്കുന്നതിനെ ഐ‌യു‌എം‌എൽ പ്രതിനിധി മുഹമ്മദ് ഷാ വിമർശിച്ചു. ബി‌എൽ‌ഒമാരോട് തിടുക്കത്തിൽ വിവരങ്ങൾ അപ്‌ലോഡ് ചെയ്യാൻ നിർബന്ധിക്കുന്നത് ജനങ്ങളുടെ പൗരത്വ രേഖകളെ ബാധിക്കും. പരിഷ്കരണ സമയത്ത് 1.19 ലക്ഷം പേരെ കണ്ടെത്താൻ കഴിഞ്ഞില്ല. എന്നാൽ വോട്ടർ പട്ടികയിൽ നിന്ന് ഇവരെ ഒഴിവാക്കാനുള്ള കാരണമായി ഇത് ഉപയോഗിക്കാനാവില്ലെന്നും മുഹമ്മദ് ഷാ പറഞ്ഞു.

അതേ സമയം, സിപിഐ എം ഉൾപ്പെടെയുള്ള പാർടികൾ ഉന്നയിച്ച പ്രശ്നങ്ങൾ പരാമർശിക്കാതെ ബിജെപി നേതാവ് ജെ ആർ പത്മകുമാർ ഒഴിഞ്ഞുമാറി. എൽ‌ഡി‌എഫും യു‌ഡി‌എഫും ജനങ്ങളെ തെരഞ്ഞെടുപ്പ് കമ്മീഷനെതിരെ തിരിക്കാൻ ശ്രമിക്കുകയാണെന്നായിരുന്നു ബിജെപി നേതാവിന്റെ ആരോപണം.