print edition എന്യൂമറേഷൻ ഫോം വിതരണം 25നകം
പൂർത്തിയാക്കണമെന്ന്‌ സിഇഒ

തിരുവനന്തപുരം: വോട്ടർപ്പട്ടിക തീവ്രപുനഃപരിശോധനയുടെ ഫോം വിതരണം നവംബർ 25നുള്ളിൽ പൂർത്തിയാക്കണമെന്ന്‌ മുഖ്യ തെരഞ്ഞെടുപ്പ്‌ ഓഫീസറുടെ നിർദേശം. കലക്ടർമാരുമായി ഞായറാഴ്ച നടന്ന യോഗത്തിലാണ്‌ രത്തൻ യു കേൽക്കർ തീരുമാനമറിയിച്ചത്‌. ഞായറാഴ്ച വൈകിട്ടുവരെ 64,457,55 പേർക്ക് (23.14 ശതമാനം) ഫോം വിതരണം ചെയ്തു, ഇത് കൃത്യമായ കണക്കല്ല. എല്ലാ ബിഎൽഒമാരും മുഴുവൻ ഡാറ്റയും അപ്‌ലോഡ്‌ ചെയ്തിട്ടില്ല. താഴെ തട്ടിൽ നടക്കുന്ന പ്രവർത്തനങ്ങൾ കൃത്യമായി നടക്കുന്നുണ്ടെന്ന്‌ കലക്ടർമാർ ഉറപ്പുവരുത്തണം. കേരളത്തെ സംബന്ധിച്ചിടത്തോളം നവംബർ 25ന് മുമ്പ്‌ ഫോം വിതരണം പൂർത്തീകരിക്കുന്നതിന് ദുർഘടങ്ങൾ ഒന്നും തന്നെയില്ലെന്ന്‌ രത്തൻ യു കേൽക്കർ പറഞ്ഞു.

കേന്ദ്ര തെരഞ്ഞെടുപ്പ്‌ കമീഷന്റെ തീരുമാനപ്രകാരം നാലുമുതൽ ഡിസംബർ നാലുവരെയാണ്‌ ഫോം നൽകാനും പൂരിപ്പിക്കാനുമുള്ള സമയം. ഡിസംബർ ഒമ്പതിനാണ്‌ പ്രാഥമിക വോട്ടർപ്പട്ടിക പ്രസിദ്ധീകരിക്കുക. പരാതികളും നിർദേശങ്ങളും അറിയിക്കാൻ ഡിസംബർ ഒമ്പത്‌ മുതൽ ജനുവരി എട്ടുവരെ അവസരമുണ്ട്‌. ഡിസംബർ ഒമ്പത്‌ മുതൽ ജനുവരി 31 വരെയാണ്‌ നോട്ടീസ്‌ നൽകൽ (തീർപ്പും പരിഹാരവും). തുടർന്ന്‌ ഫെബ്രുവരി ഏഴിന്‌ അന്തിമ വോട്ടർപ്പട്ടിക പ്രസിദ്ധീകരിക്കും.

2002ലെ പട്ടികയിൽ പേരുണ്ടോ, ഓൺലൈനിലൂടെ പരിശോധിക്കാം

തിരുവനന്തപുരം: 2002ലെ വോട്ടർപ്പട്ടികയിൽ പേരുണ്ടോ എന്ന്‌ തെരഞ്ഞെടുപ്പ്‌ കമീഷന്റെ വെബ്‌സൈറ്റിലൂടെ പരിശോധിക്കാം. https://www.ceo.kerala.gov.in/voter-search എന്ന ലിങ്കിൽകയറി ജില്ല, നിയോജകമണ്ഡലം, ബൂത്ത്‌, വോട്ടറുടെ പേര്‌, പാർട്‌ സീരിയൽ നമ്പർ എന്നിവ നൽകണം. വോട്ടറുടെ പേര്‌ മലയാളത്തിൽത്തന്നെ നൽകണം. ഓപ്‌ഷനിലെ മുഴുവൻ കാര്യങ്ങളും അറിയില്ലെന്നുണ്ടെങ്കിൽ ജില്ല, നിയമസഭാ മണ്ഡലം, ബൂത്തിന്റെ പേര്‌/ വോട്ടറുടെ പേര്‌ എന്നിവ നൽകി പരിശോധിക്കാം.

ഓൺലൈൻ സംവിധാനത്തിലൂടെ പേര്‌ കണ്ടെത്താൻ പ്രയാസമാണെന്നാണ്‌ വോട്ടർമാർ പറയുന്നത്‌. മണിക്കൂറുകളോളം തെരഞ്ഞപ്പോഴാണ്‌ പലർക്കും കണ്ടെത്താനായത്‌. മാർഗനിർദേശത്തിൽ പറയുംപോലെ വിവരംനൽകിയിട്ടും ചിലർക്ക്‌ വിവരങ്ങൾ കിട്ടുന്നില്ലെന്നും പരാതിയുണ്ട്‌. മൊബൈൽ ഫോണിൽ പരിശോധിക്കുന്നത്‌ ബുദ്ധിമുട്ടാണെന്നും പറയുന്നു. പരിമിതമായ സാങ്കേതിക പരിജ്ഞാനം മാത്രമുള്ളവർക്കും പ്രയാസം നേരിടുന്നു.