മുപ്പത് മണ്ഡലങ്ങളിൽ ബിജെപി വോട്ട് മറിച്ചു; വർ​ഗീയ ചേരിതിരിവിനുള്ള ലീ​ഗിന്റെ ശ്രമം അപകടകരം: എം വി ​ഗോവിന്ദൻ

തിരുവനന്തപുരം: നിയമസഭാ തെരഞ്ഞെടുപ്പിൽ സംസ്ഥാനത്ത് ബിജെപി-യുഡിഎഫ് ഡീൽ ശക്തമായിരുന്നുവെന്ന് സിപിഐ എം സംസ്ഥാന സെക്രട്ടറി എം വി ​ഗോവിന്ദൻ പറഞ്ഞു. ഏതാണ്ട് 30 മണ്ഡലങ്ങളിൽ ബിജെപി വോട്ടുകൾ യുഡിഎഫിന് മറിച്ചുനൽകി. ചില മണ്ഡലങ്ങളിൽ ബിജെപിക്ക് യുഡിഎഫ് വോട്ടും നൽകി. ബിജെപി വിജയിച്ചയിടങ്ങളിൽ യുഡിഎഫ് മൂന്നാം സ്ഥാനത്താണെന്നും എം വി ​ഗോവിന്ദൻ വാർത്താസമ്മേളനത്തിൽ ചൂണ്ടിക്കാട്ടി.

കേരളത്തിൽ മൂന്ന് സീറ്റിൽ ബിജെപി ജയിച്ചത് ​ഗൗരവതരാണ്. ബിജെപി സംസ്ഥാന പ്രസിഡന്റ് നേരത്തെ പറഞ്ഞത് തങ്ങൾ ഈ തെരഞ്ഞെടുപ്പിൽ ലക്ഷ്യമിട്ടത് സിപിഐ എമ്മിനെയും എൽഡിഎഫിനെയുമാണെന്നാണ്. പല മണ്ഡലങ്ങളിലും യുഡിഎഫിന് ബിജെപി വോട്ട് ലഭിച്ചു എന്ന് ഉറപ്പാക്കിയിട്ടാണ് 100 സീറ്റിന് മുകളിൽനേടുമെന്ന് അവകാശപ്പെട്ടത്. കൃത്യമായ അജണ്ടവെച്ച്, സിപിഐ എമ്മും ബിജെപിയും തമ്മിൽ ഡീലുണ്ടെന്ന് പ്രചരിപ്പിച്ചിട്ട്, കോൺ​ഗ്രസും ബിജെപിയും വോട്ടുകൾ പരസ്പരം കൈമാറി.

രാഹുൽ ​ഗാന്ധി ഉൾപ്പെടെ കേരളത്തിൽവന്ന് എൽഡിഎഫിനും സിപിഐ എമ്മിനും എതിരായി പ്രസം​ഗിച്ചു. കേന്ദ്രഏജൻസികൾ എന്തുകൊണ്ട് പിണറായി വിജയനെ അറസ്റ്റ് ചെയ്യുന്നില്ല എന്നും രാഹുൽ ​ഗാന്ധി ചോദിച്ചു. എന്നാൽ യുഡിഎഫ് സർക്കാർ അധികാരത്തിൽവന്ന് ദിവസങ്ങൾക്കുള്ളിൽ നടന്ന ഇഡി റെയ്ഡിലൂടെ ബിജെപി-ഡീൽ തെളിഞ്ഞു. കേരളത്തിലെ കോൺ​ഗ്രസ് നേതൃത്വത്തിന്റെ പ്രേരണയിലാണ് താൻ പിണറായിക്കെതിരെ സംസാരിച്ചതെന്ന് രാഹുൽ​ഗാന്ധി തന്നെ ഇന്ത്യാ കൂട്ടായ്മയുടെ യോ​ഗത്തിൽ വെളിപ്പെടുത്തി.

കർണാടകയിൽ എൻഡിഎ ഘടകകക്ഷികളുമായി മുഖ്യമന്ത്രിയാകുന്നതിന് മുൻപ് വി ഡി സതീശൻ നടത്തിയ കൂടിക്കാഴ്ച ദുരൂഹമാണ്. എന്തിനായിരുന്നു ആ കൂടിക്കാഴ്ചയെന്ന് തുറന്നുപറയാൻ മുഖ്യമന്ത്രി തയ്യാറായിട്ടില്ല. കേരളത്തിലെയും കർണാടകത്തിലെയും സത്യപ്രതിജ്ഞാ ചടങ്ങിന്റെ ഭാ​ഗമായി വന്ദേമാതരം ചൊല്ലിയത്, പിഎം ശ്രീ പദ്ധതി നടപ്പാക്കുന്നത്, എംജി സർവകലാശാലയിലെ കാവിവൽക്കരണം- ഇതിലൊക്കെ ബിജെപി- കോൺ​ഗ്രസ് ഡീൽ വ്യക്തമാണ്.

ബിജെപിയും കോൺ​ഗ്രസും വൻതോതിൽ പണമൊഴുക്കിയാണ് തെരഞ്ഞെടുപ്പ് പ്രചാരണം നടത്തിയത്. ബിജെപി ഭരിക്കുന്ന സംസ്ഥാനങ്ങളില്‍ നിന്നും മന്ത്രിമാരും എംപി - എംഎല്‍എമാരും പണവുമായി കേരളത്തിലെത്തുകയും ക്ഷേത്ര ഭാരവാഹികള്‍ക്കും വോട്ടര്‍മാര്‍ക്കും നേരിട്ട്‌ പണം വിതരണം ചെയ്‌തിട്ടുണ്ട്‌. വോട്ടര്‍മാരുടെ പേരിലുള്ള ബാങ്ക്‌ ലോണുകള്‍ പോലും ബിജെപിക്കാര്‍ അടച്ചു നല്‍കിയിട്ടുണ്ട്‌. യുഡിഎഫും പല മണ്ഡലങ്ങളിലും പണമൊഴുക്കിയിട്ടുണ്ട്‌.

മതത്തെ ഉപയോഗിച്ച്‌ വര്‍​ഗീയ ചേരിതിരിവ്‌ സൃഷ്‌ടിക്കാനാണ്‌ മുസ്ലിം ലീഗ്‌ ശ്രമിച്ചുവരുന്നത്‌. ഇത്‌ മതനിരപേക്ഷ കേരളത്തില്‍ വളരെ അപകടകരമാണ്‌. എസ്‌ഐആര്‍ ന്യൂനപക്ഷങ്ങളിലുണ്ടാക്കിയ ആശങ്കയെ ലീഗ്‌ - ജമാ അത്തെ ഇസ്ലാമി - കോണ്‍ഗ്രസ് കൂട്ടുകെട്ട്‌ ഉപയോഗപ്പെടുത്തി. എസ്‌ഐആര്‍ കൊണ്ടുവന്നത്‌ പിണറായി വിജയന്‍ സര്‍ക്കാരാണെന്നുള്ള കള്ളപ്രചരണം നടത്തുകയും ചെയ്‌തു. ഇത്‌ ന്യൂനപക്ഷങ്ങളെ ഇടതുപക്ഷ വിരുദ്ധ ചേരിയില്‍ എത്തിക്കാനിടയാക്കിയെന്നും എം വി ​ഗോവിന്ദൻ പറഞ്ഞു.