ചേർത്തുപിടിച്ചവർക്കും പ്രാർത്ഥനകൾക്കും നന്ദി’ ആവണി ഹാപ്പിയാണ്‌; ഒപ്പം ഷാരോണും

ആലപ്പുഴ: ചേർത്തുപിടിച്ചവർക്കും പ്രാർത്ഥിച്ചവർക്കും ഹൃദയത്തിൽനിന്ന് നന്ദി’– ആശുപത്രി കിടക്കയിൽനിന്ന്‌ നിറഞ്ഞ പുഞ്ചികളോടെ ആവണി പറഞ്ഞു. പ്രിയതമയുടെ കൈപിടിച്ച്‌ ഒപ്പം ഷാരോണുമുണ്ട്‌. വേദനകളുടെയും ആശങ്കകളുടെയും ഒരാഴ്‌ചക്കാലം ഒരുമിച്ച്‌ നടന്നുത‍ീർത്ത്‌ പൂർണമായല്ലെങ്കിലും സ്വപ്നം കണ്ട ജീവിതത്തിലേക്ക്‌ മടങ്ങിയെത്തിയതിന്റെ സന്തോഷം ഇരുമുഖങ്ങളിലും. വിവാഹ ദിവസം അപ്രതീക്ഷിതമായി കടന്നെത്തിയ അപകടത്തിൽ പരിക്കേറ്റ്‌ അത്യാഹിത വിഭാഗത്തിൽ ചികിത്സയിൽ കഴിയവെ വിവാഹിതയായ ആലപ്പുഴ കൊമ്മാടി മുത്തലശേരിയിൽ ആവണി സാധാരണ ജീവിതത്തിലേക്ക്‌ ചുവടുവെയ്‌ക്കുകയാണ്‌.

21ന്‌ വിവാഹ ദിവസം പുലർച്ചെ മേക്കപ്പിനായി കുമരകത്തേക്ക് പോകുമ്പോൾ കാർ മരത്തിൽ ഇടിച്ചാണ്‌ ആവണിക്കും ഒപ്പമുണ്ടായിരുന്നവർക്കും പരിക്കേറ്റത്‌. കോട്ടയം മെഡിക്കൽ കോളജ്‌ ആശുപത്രിയിൽ എത്തിച്ചെങ്കിലും നട്ടെല്ലിനേറ്റ പരിക്ക് ഗുരുതരമായതിനാൽ ആവണിയെ വിദഗ്ധ ചികിത്സക്ക്‌ എറണാകുളത്തേക്ക്‌ മാറ്റി. നിശ്ചയിച്ച മുഹൂർത്തത്തിൽ തന്നെ വിവാഹം നടത്തണമെന്ന വരൻ ഷാരോണിന്റെയും ഇരുകുടുംബങ്ങളുടെയും ആഗ്രഹപ്രകാരം അത്യാഹിത വിഭാഗത്തിൽ തന്നെ താലികെട്ടാനുള്ള സൗകര്യമൊരുക്കുകയായിരുന്നു. നട്ടെല്ലിന്റെ ശസ്‌ത്രക്രിയ്‌ക്ക്‌ ശേഷം നിരീക്ഷണത്തിൽ കഴിഞ്ഞ ആവണിയെ വെള്ളിയാഴ്‌ച മുറിയിലേക്ക്‌ മാറ്റി.

ശസ്ത്രക്രിയക്ക് ശേഷം ഫിസിയോ തെറാപ്പി ആരംഭിച്ചു. തിങ്കളാഴ്‌ചയോ ചൊവ്വാഴ്‌ചയോ ആശുപത്രി വിടാനാകും. കാലുകൾ അവിടെയുണ്ടെന്ന് പോലും തിരിച്ചറിയാത്ത വിധത്തിലാണ്‌ ആശുപത്രിയിലെത്തിയതെന്ന്‌ ആവണി പറഞ്ഞു. ‘അപകടമുണ്ടായതോടെ എന്റെ ചിന്ത മുഴുവൻ ഷാരോണിനെക്കുറിച്ചായിരുന്നു. എന്റെ ജീവിതമോ പോയി, ഷാരോണിന് കൂടി അതുണ്ടാകരുതെന്നാണ് ഓർത്തത്. എന്നാൽ ഷാരോൺ എന്നെ ചേർത്തുപിടിച്ച് ഒപ്പംനിന്നു–- ആവണി പറഞ്ഞു. ആവണിക്ക് അപകടം സംഭവിച്ച വിവരം ഞെട്ടലോടെയാണ് കേട്ടതെന്ന് ഷാരോൺ പറഞ്ഞു.

‘എന്ത് സംഭവിച്ചാലും ജീവിത കാലം മുഴുവൻ ഒപ്പമുണ്ടെന്ന് അറിയിക്കാൻ ഓടിയെത്തുകയായിരുന്നു. പല ഭാഷകളിൽ നിന്നുള്ളവർ സ്നേഹാശംസകൾ അറിയിക്കുകയും പ്രാർഥിക്കുകയും ചെയ്യുന്നുണ്ട്. എല്ലാവരോടും തീർത്താൽ തീരാത്ത കടപ്പാടുണ്ട്– ഷാരോൺ പറഞ്ഞു. മാവേലിക്കര ബിഷപ്‌ മൂർ സ്‌കൂൾ അധ്യാപികയായ ആവണിയുടെ മാതാപിതാക്കളായ എം ജഗദീഷും ജ്യോതിയുമാണ്‌ ആശുപത്രിയിൽ ഇരുവർക്കുമൊപ്പമുള്ളത്‌. ചേർത്തല കെവിഎം കോളജ് ഓഫ് എൻജിനീയറിങ്‌ ആൻഡ് ഇൻഫർമേഷൻ ടെക്‌നോളജി അസി. പ്രൊഫസറാണ്‌ തുമ്പോളി വളപ്പിൽ വി എം ഷാരോൺ.

ആരോഗ്യസ്ഥിതി വീണ്ടെടുത്തതിന് ശേഷം ചെറിയ രീതിയിൽ ഒരു വിവാഹ സൽക്കാരം നടത്തുന്നതിനെകുറിച്ചുള്ള ആലോചനയിലാണ്‌ ഇരുവരും. എറണാകുളം വിപിഎസ് ലേക്‌ഷോർ ആശുപത്രി ആവണിക്കും ഷാരോണിനും വിവാഹ സമ്മാനമായി ചികിത്സ സൗജന്യമാക്കിയിരുന്നു.