print edition ചെലവുനിയന്ത്രണം സ്വാഭാവിക നടപടി

തിരുവനന്തപുരം: സർക്കാർ കെട്ടിടം മോടികൂട്ടാനും വാഹനം, ഫർണിച്ചർ എന്നിവ വാങ്ങാനും കോവിഡ്‌ കാലംമുതൽ ഏർപ്പെടുത്തിയ നിയന്ത്രണം ഒരുവർഷംകൂടി നീട്ടി. അത്യാവശ്യമല്ലാത്ത കാര്യങ്ങളിലെ നിയന്ത്രണം സ്വാഭാവിക നടപടിയാണെങ്കിലും സംസ്ഥാനത്തിന്റെ സാമ്പത്തിക സ്ഥിതി മോശമെന്ന്‌ വരുത്താനാണ്‌ മലയാള മനോരമ പത്രത്തിന്റെ ശ്രമം.

തെരഞ്ഞെടുപ്പ്‌ പ്രഖ്യാപിച്ചശേഷം സർക്കാർ വിരുദ്ധ വാർത്തകൾ സൃഷ്‌ടിക്കുന്നതിന്റെ ഭാഗമായാണ്‌ ഇതും. കോവിഡ്‌ കാലത്ത്‌ വരുമാനം നിലയ്‌ക്കുകയും ചെലവ്‌ കൂടുകയുംചെയ്‌തപ്പോഴാണ്‌ വിദഗ്‌ധസമിതി ശുപാർശയിൽ അത്യാവശ്യമല്ലാത്ത ചെലവുകൾക്ക്‌ നിയന്ത്രണമുണ്ടായത്‌. ധനദൃഢീകരണത്തിനായുള്ള ഉത്തരവ്‌ പിന്നീട്‌ നീട്ടി. കോവിഡ്‌ കാലത്തെ ആഘാതം വലുതായിരുന്നു. അതാണ്‌ ഇത്തവണയുമുണ്ടായത്‌. ഇത്‌ സ്വാഭാവിക നടപടിമാത്രമാണെന്ന്‌ ധനവകുപ്പ്‌ വൃത്തങ്ങൾ പറഞ്ഞു.

കേന്ദ്രസർക്കാരുണ്ടാക്കിയ പരിമിതിയിലും തനത്‌ വരുമാനം വർധിപ്പിച്ചും മറ്റു ഉറവിടങ്ങളിലൂടെയും സാമ്പത്തികസ്ഥിതി മെച്ചപ്പെട്ടതിനാലാണ്‌ സ്‌ത്രീസുരക്ഷാ പെൻഷൻ, യുവാക്കൾക്കായുള്ള കണക്ട്‌ ടു വർക്ക്‌ തുടങ്ങിയ പദ്ധതികൾ നടപ്പാക്കിയതും ക്ഷേമപെൻഷൻ രണ്ടായിരമാക്കിയതും ആശമാർ, അങ്കണവാടി വർക്കർമാർ, സ്‌കൂൾ പാചകത്തൊഴിലാളികൾ എന്നിവരുടെ ഓണറേറിയം വർധിപ്പിച്ചതും. ക്ഷേമപെൻഷൻ വർധന നടപ്പായിത്തുടങ്ങി. മറ്റുള്ളവയും ഇ‍ൗ മാസം നിലവിൽവരും. ചെലവുനിയന്ത്രണമെന്നാൽ പദ്ധതികൾ തടഞ്ഞുവയ്‌ക്കലല്ല.

ട്രഷറി പൂട്ടിയും കരാറുകാർക്കുൾപ്പെടെ തുക തടഞ്ഞുവച്ചുമായിരുന്നു 2011–16 യുഡിഎഫ്‌ ഭരണം. നികുതിപിരിവിലെ കെടുകാര്യസ്ഥതയും ചെലവുചുരുക്കാത്തതുംകാരണം സാമ്പത്തികനേട്ടങ്ങൾ നഷ്ടപ്പെട്ടതായി 2016-ലെ സാമ്പത്തിക അവലോകന റിപ്പോർട്ടിലുമുണ്ട്‌. 2013ലെ ഓണക്കാലത്ത് ട്രഷറി കാലിയായിരുന്നു. ശമ്പളവും പെൻഷനും നൽകാൻ ബുദ്ധിമുട്ടി. 2014-ൽ സാമ്പത്തിക പ്രതിസന്ധിമൂലം ട്രഷറിയിൽനിന്ന് ബില്ലുകൾ മാറാനാകാത്ത ദിവസങ്ങളുണ്ടായി. 2014–15ൽ ഗവ. കരാറുകാർ രണ്ടുതവണ അനിശ്‌ചിതകാലസമരം നടത്തി. അതിൽനിന്ന്‌ മാറിയ കാലമാണ്‌ മെച്ചപ്പെട്ട ധനമാനേജ്‌മെന്റിലൂടെ എൽഡിഎഫ്‌ സർക്കാർ സൃഷ്‌ടിച്ചത്‌.