Top
16
Saturday, December 2017
About UsE-Paper

സ്ത്രീകള്‍ക്കായി ആദ്യ മലയാളം വെബ്‌സൈറ്റ് ആരംഭിച്ചു

Friday Mar 24, 2017
വെബ് ഡെസ്‌ക്‌

തിരുവനതപുരം> സ്ത്രീകള്‍ക്കായി മലയാളത്തിലെ ആദ്യ വെബ്‌‌സൈറ്റ് പിറന്നു. 'സ്ത്രീകള്‍ക്ക് സ്വതന്ത്രമായി വിഹരിക്കാന്‍ ഒരു ഡിജിറ്റല്‍ ഇടം' എന്ന നിലയിലുള്ള സൈറ്റിന്റെ ഉദ്ഘാടനം സുഗതകുമാരിയും ഫേസ്‌ബുക് പേജിന്റെ ഉദ്‌ഘാടനം ചന്ദ്രമതിയും നിര്‍വഹിച്ചു.womenpoint.in ആണ് വെബ്‌‌സൈറ്റ് വിലാസം.

ആക്രമണ ഭീതി ഇല്ലാതെ, ആരും പിന്തുടര്‍ന്ന് ശല്യപ്പെടുത്താത്ത എന്ത് അഭിപ്രായവും വെട്ടി തുറന്നു പറയാന്‍ കഴിയുന്ന പൊതുഇടമായിട്ടാണ് വിമന്‍പോയിന്റ് ആരംഭിച്ചിരിക്കുന്നതെന്നു സംഘാടകര്‍ അറിയിച്ചു.  കേരളത്തിലെ സ്ത്രീകളെ സംബന്ധിച്ച എന്ത് വിവരവും 'വിവരശേഖരം' എന്ന ഭാഗത്തു നിന്നും ലഭ്യമാക്കുക എന്നതും  ഉദ്ദേശ്യങ്ങളില്‍ പെടുന്നു. സൈറ്റിലെ 'വട്ടമേശ ' സംവാദത്തിനുള്ള വേദി ആണ്. പ്രസക്തമായ വിഷയങ്ങള്‍ ഇവിടെ സജീവ ചര്‍ച്ചക്ക് വിധേയമാകുന്നു. പാനലിസ്റ്റുകള്‍ക്കു പുറമെ പുറത്തു നിന്നുള്ളവര്‍ക്കും അഭിപ്രായം രേഖപ്പെടുത്താം. ഇത്തരത്തില്‍ വാര്‍ത്തയും വിവരങ്ങളും കാഴ്ചപ്പാടും ലേഖനങ്ങളും അഭിമുഖങ്ങളും ഉള്‍പ്പെടുന്ന സമഗ്രമായ ഒരു സ്ത്രീവെബ്‌സൈറ്റ് കേരളത്തില്‍ ആദ്യമാണ്. സ്ത്രീകള്‍ തന്നെ സ്ത്രീകള്‍ക്ക് വേണ്ടി നടത്തുന്ന ആദ്യ  വെബ്‌സൈറ്റ് എന്ന പ്രത്യേകതയും വിമന്‍പോയിന്റിനു അവകാശപ്പെടാം. 

വൈവിധ്യമാര്‍ന്ന സ്ത്രീ ജീവിതം ശരിയായ രീതിയില്‍ മുഖ്യധാരാ മാധ്യമങ്ങള്‍ പ്രതിഫലിപ്പിക്കുന്നില്ല എന്ന തിരിച്ചറിവില്‍ നിന്നാണ് ഇത്തരം ഒരു സംരംഭം എന്ന ആശയം പിറവി എടുത്തത്. പീഡന കഥകളില്‍ മാത്രം സ്ത്രീ കടന്നു വരുമ്പോള്‍ നേട്ടങ്ങളും ആഹ്ലാദങ്ങളും സ്ത്രീക്ക് ഇല്ല എന്ന പ്രതീതി ആണ് ഉണ്ടാവുക. ഇതില്‍ നിന്നും വ്യത്യസ്തമായി സ്ത്രീയുടെ ക്രിയാത്മക സാന്നിധ്യം വിമന്‍ പോയിന്റില്‍ ഉണ്ടാകുമെന്നു ഇതിന്റെ സംഘാടകര്‍ അവകാശപ്പെടുന്നു.

ഉദ്ഘാടനപരിപാടിയുടെ ഭാഗമായി നടന്ന 'മാധ്യമങ്ങളിലെ സ്ത്രീയിടം' എന്ന സെമിനാറില്‍ ഡോ മീന ടി പിള്ള വിഷയം അവതരിപ്പിച്ചു . ഏലിയാമ്മ വിജയന്‍, എം എസ് ശ്രീകല എന്നിവര്‍ ചര്‍ച്ചയില്‍ പങ്കെടുത്തു.

'സംവാദം, സൗഹൃദം, സമന്വയം' എന്നതാണ് വിമന്‍പോയിന്റിന്റെ മുദ്രാ വാചകം. ആര്‍ പാര്‍വതി ദേവി (ചീഫ് എഡിറ്റര്‍ ), സുജ സൂസന്‍ ജോര്‍ജ് (മാനേജിങ് എഡിറ്റര്‍ ), സുനിത ബാലകൃഷ്ണന്‍ (വര്‍ക്കിങ് എഡിറ്റര്‍ ) എന്നിവരാണ് വിമന്‍പോയിന്റ് ആരംഭിച്ചത്.

Tags :
womenpoint