17 November Saturday

ആഗോളതാപനം വീടിനകത്തെ ചൂടുകൂട്ടുമ്പോൾ

ഡോ. ഗോപകുമാർ ചോലയിൽUpdated: Thursday Jul 5, 2018

 


കാലാവസ്ഥാ വ്യതിയാനംമൂലം ഭൂമിയിൽ ചൂടേറുകയാണ്. ചിലയിടങ്ങളിൽ ജനങ്ങളുടെ സഹിഷ്ണുതാ പരിധി കവിഞ്ഞും അന്തരീക്ഷതാപനം ഉയർന്നുകൊണ്ടിരിക്കുന്നു.  വായുസഞ്ചാരത്തിന്റെ കുറവ്, വെയിലേറ്റ് ഭിത്തികളും മേൽക്കൂരയും ചൂടാകുക എന്നിവയിലൂടെ വീടിനകത്തെ താപനില വർധിക്കുന്നു. വീടിനുപുറത്തെ താരതമ്യേന കുറഞ്ഞ താപനില വീടിനകത്തും നിലനിർത്താൻ   എളുപ്പമാർഗം ഒരു ശീതീകരണയന്ത്രം സ്ഥാപിച്ചാൽ മതി എന്ന ചിന്താഗതി വ്യാപകമാകുന്നു.

ഭാവിയിൽ ഉഷ്ണം വർധിക്കാനുള്ള സാധ്യതകൾക്കാണ്‌ മുൻതൂക്കം. വൻ നഗരങ്ങൾ (10 ദശലക്ഷത്തിലേറെ), ജനങ്ങൾ തിങ്ങിപ്പാർക്കുന്ന നഗരകേന്ദ്രങ്ങൾ എന്നിവിടങ്ങളിലാണ് അന്തരീക്ഷതാപം വർധിക്കുന്നതുമൂലം ഏറ്റവും കൂടുതൽ പ്രതിസന്ധി ഉണ്ടാകുന്നത്. അന്തരീക്ഷ ആർദ്രതകൂടി വർധിക്കുന്നപക്ഷം താപവർധന കൂടുതൽ മാരക സ്വഭാവം ആർജിക്കും. നഗരങ്ങളിൽ അനുഭവപ്പെടുന്ന ‘ഉഷ്ണതുരുത്ത്’ പ്രഭാവംമൂലം അന്തരീക്ഷതാപം ഉയരുന്നഘട്ടത്തിലും നഗരങ്ങളാണ് കൂടുതൽ അപകടഭീഷണിക്ക്‌ അടിപ്പെടുന്നത്.

തങ്ങളുടെ ശരീരവും ചുറ്റുപാടുകളും താപനത്തിന്റെ ദുഷ്ഫലങ്ങൾക്ക്‌ വിട്ടുകൊടുക്കാതെ  തണുപ്പിച്ചുനിർത്തുവാനുള്ള തത്രപ്പാട്‌  ചെന്നെത്തി നിൽക്കുന്നത് അമിത ഊർജവിനിയോഗം വേണ്ടിവരുന്ന ശീതീകരണോപാധികളിലാണ്ശീതീകരിണികളും, വൈദ്യുത പങ്കകളും പ്രവർത്തിപ്പിച്ച് ചൂടു കുറയ്‌ക്കുന്നതിനു മാത്രം  ലോകത്താകമാനം ഉപയോഗിക്കുന്ന ആകെ വൈദ്യുതോർജത്തിന്റെ 20 ശതമാനത്തോളം വേണ്ടിവരും.1990കളെ അപേക്ഷിച്ച്‌ വൈദ്യുതോർജംകൊണ്ട്  പ്രവർത്തിപ്പിക്കുന്ന ഫാനുകൾ, ശീതീകരണികൾ എന്നിവയുടെ വിൽപ്പന ആഗോളതലത്തിൽ മൂന്നിരട്ടിയിലേറെയായി. ഇവയുടെ പകുതിയിലേറെയും ഉപയോഗിക്കുന്നത്‌ കേവലം രണ്ട്‌ രാഷ്‌ട്രങ്ങളിലാണ്‌.  ചൈനയിലും അമേരിക്കൻ ഐക്യനാടുകളിലും. പ്രതിവർഷം ഉദ്ദേശം 1.6 ബില്യൺ ശീതീകരണികളാണ് ലോകത്താകമാനം പ്രവർത്തിപ്പിക്കുന്നത്.  ഇവയുടെ പ്രവർത്തനത്തിന്  വേണ്ടിവരുന്ന വൈദ്യുതി ഏകദേശം 2000 ടെറാവാട്ട്  മണിക്കൂർ (ഠണഒ) ആണ്. ശീതീകരണപ്രക്രിയ വഴി അന്തരീക്ഷത്തിലേക്ക് പുറന്തള്ളുന്ന കാർബൺ ഡയോക്സൈഡിന്റെ അളവ് ഉദ്ദേശം 1130 മില്യൺ ടൺ ആണ്. 1990കളിൽ ഇത്തരത്തിൽ പുറന്തള്ളപ്പെട്ട കാർബൺ ഡയോക്സൈഡിന്റെ അളവിനെക്കാൾ മൂന്നിരട്ടിയോളമാണിത്‌.  ഇതുമൂലം വായു മലിനീകരണം വർധിക്കുന്നു. മാത്രമല്ല, ആഗോളതാപനത്തിന് ആക്കംകൂട്ടുന്ന പ്രമുഖ ഹരിതഗൃഹവാതകമാണ്‌ കാർബൺ ഡയോക്സൈഡ്. തന്മൂലം ശീതീകരണോപാധികളുടെ ഏറിവരുന്ന ഉപയോഗം പരോക്ഷമായി ആഗോളതപാനം ഏറ്റുകയാണെന്നു പറയാം. അന്താരാഷ്ട്ര ഊർജ ഏജൻസിയുടെ വിശകലനങ്ങൾപ്രകാരം ശീതീകരണത്തിനുവേണ്ടി ചെലവഴിക്കേണ്ടിവരുന്ന ഊർജ നഷ്ടം ഭാവിയിൽ വർധിക്കാനാണ്‌ സാധ്യത. 2050‐ഓടെ ഇപ്രകാരം ആവശ്യമുള്ള  ഊർജ ഉപയോഗം മൂന്നിരട്ടിയോളം വർധിച്ച് 6200 ഠണഒ (ഠലൃൃമ ണമഹ ഒീൌൃ) ൽ എത്തും.

ശീതീകരണികൾ മാത്രം പോരാ
ശീതീകരണ യന്ത്രങ്ങൾ ഒഴിവാക്കാനാവാത്ത സ്ഥിതിക്ക്‌  സ്വീകാര്യമായ ഒരു പരിഹാരമാർഗം എന്തെന്നാൽ, സാങ്കേതിക മികവാർന്നതും മികച്ച പ്രവർത്തനക്ഷമതയും ഉള്ള ശീതീകരണ സംവിധാനങ്ങൾ നടപ്പിൽവരുത്തുക എന്നതാണ്.
റഫ്രിജറേറ്ററുകൾ പ്രവർത്തിക്കുന്ന അതേ തത്വത്തിലാണ് എയർകണ്ടീഷണറുകളും പ്രവർത്തിക്കുന്നത്. രണ്ട്‌ ഉപകരണങ്ങളിലും വാതകത്തെ ദ്രാവകമാക്കി പരിവർത്തനം ചെയ്യുകയാണ്. ധാരാളം ഊർജം ആവശ്യമുള്ള പ്രക്രിയയാണിത്.  ഈ പ്രക്രിയയിൽ വിമുക്തമാക്കപ്പെടുന്ന താപോർജം അന്തരീക്ഷത്തെ ചൂടുപിടിപ്പിക്കുന്നു.

ശീതീകരണ യന്ത്രങ്ങളുടെ കാര്യക്ഷമത മെച്ചപ്പെടുത്തുക, വളരെ കുറഞ്ഞ ഊർജത്തിൽ മികച്ച പ്രവർത്തനം ഉറപ്പുനൽകുന്ന പ്രവർത്തനനിലവാര മാനദണ്ഡങ്ങൾ കർശനമാക്കുക, ഉപയോക്താക്കൾക്ക്‌ നിർദേശങ്ങൾ നൽകുന്ന വ്യക്തമായ ലേബലിങ്‌ സമ്പ്രദായം നടപ്പിൽ വരുത്തുക എന്നിവയെല്ലാം കാര്യക്ഷമത വർധിപ്പിക്കുന്നതിന്റെ ഭാഗമായി അവലംബിക്കാവുന്നതാണ്. ഇത്തരത്തിൽ ഭരണകൂടങ്ങൾ തങ്ങളുടെ നയപരിപാടികൾ മാറ്റിയെഴുതിയാൽ അടുത്ത 30 വർഷത്തിനകം ശീതീകരണ സംവിധാനങ്ങൾക്കുള്ള ശരാശരി ഊർജക്ഷമത ഇരട്ടിയിലേറെയായി വർധിപ്പിക്കാൻ അവയുടെ നിർമാതാക്കൾ നിർബന്ധിതരാകും. കാര്യക്ഷമത മെച്ചപ്പെടുത്തുന്നപക്ഷം 2050 ഓടെ മൂന്നിരട്ടിയെത്തുമെന്ന്‌ പ്രതീക്ഷിക്കുന്ന വൈദ്യുത ഊർജ ഉപയോഗത്തിൽ 45 ശതമാനം വരെ കുറവുവരുത്താനാകും.

അമേരിക്കൻ ഐക്യനാടുകളെപ്പോലെ ശീതീകരണം മറ്റ്‌ രാഷ്‌ട്രങ്ങളിലും സാർവത്രികമാകുന്ന അവസ്ഥയും അനുമാനിത പഠന വിധേയമാക്കിയിട്ടുണ്ട്. ഇത്തരത്തിലുള്ള 25 രാഷ്ട്രങ്ങളെടുത്താൽ അതിൽ 14 എണ്ണം ആഫ്രിക്കയിലും രണ്ടെണ്ണംവീതം തെക്കേ അമേരിക്ക, വടക്കേ അമേരിക്ക എന്നിവിടങ്ങളിലുമാണ്. ലോകരാഷ്ട്രങ്ങളിൽ എട്ടു രാഷ്ട്രങ്ങൾക്ക് അമേരിക്കൻ ഐക്യനാടുകളുടെ ശീതീകരണി ഉപയോഗത്തെ മറികടക്കുന്ന സാഹചര്യവും നിലനിൽക്കുന്നുണ്ട്. ഇന്ത്യക്കാർ അമേരിക്കൻ ഐക്യനാടുകളുടെ നിലവാരത്തിൽ ശീതീകരണം അവലംബിക്കുന്നപക്ഷം ഇക്കാര്യത്തിൽ, ഊർജ ഉപയോഗത്തിന്റെ കാര്യത്തിൽ യുഎസിനെക്കാൾ 14 മടങ്ങ് ഊർജം ഇന്ത്യക്ക്‌ വേണ്ടിവരും.

അപകടകരങ്ങളായ ഉഷ്ണതരംഗ സാഹചര്യങ്ങളിൽ മനുഷ്യരുടെ സുരക്ഷ ഉറപ്പാക്കുന്നതിനുള്ള ഒരു മാർഗമാണ്‌ മികച്ച പ്രതിഫലനശേഷിയുള്ള നിർമാണ ‐ നഗര സംവിധാന രീതികൾ അവലംബിക്കുകയെന്നത്. കെട്ടിടങ്ങളിൽ വെളുത്ത പെയിന്റ് അടിക്കുക, തിളങ്ങുന്ന മേൽക്കൂരകൾ നിർമിക്കുക, വിളറിയ നിറത്തോടുകൂടിയ ഇലകളുള്ള വൃക്ഷങ്ങൾ നടുക എന്നിവ പ്രതിഫലനശേഷി വർധിപ്പിക്കാനുതകുന്ന കാര്യങ്ങളാണ്. സൂര്യപ്രകാശത്തിന്റെ ഏറിയപങ്കും അന്തരീക്ഷത്തിലേക്കുതന്നെ തിരിച്ച്‌ പ്രതിഫലിപ്പിക്കുക. അതുവഴി ജീവസുരക്ഷ ഉറപ്പാക്കുകയും അന്തരീക്ഷം തണുപ്പിക്കാൻ ഉപയോഗിക്കുന്ന ഊർജ ഉപയോഗം കുറയ്‌ക്കുകയും ചെയ്യാനാകും. അന്തരീക്ഷത്തിലെ സ്‌ട്രാറ്റോസ്‌ഫിയർ മണ്ഡലത്തിലേക്ക്‌ വളരെ ചെറിയ  ധൂളികണങ്ങൾ (എയ്റോസോളുകൾ) വിതാനിക്കുകയെന്നത്‌ പ്രതിഫലനശേഷി വർധിപ്പിക്കാൻ സഹായിക്കുന്ന ഒരു രീതിയാണ്. സൗരവികിരണങ്ങളെ പ്രതിഫലിപ്പിക്കുന്ന റിഫ്ളക്‌റ്ററുകൾ ഭൂഭ്രമണപഥത്തിൽ സ്ഥാപിക്കുക എന്നിവ കൂടുതൽ സങ്കീർണമായ ജിയോ എൻജിനിയറിങ്‌ രീതികളാണ്‌. എന്നാൽ, ഇത്തരത്തിലുള്ള സാങ്കേതികരീതികളൊന്നുംതന്നെ കാലാവസ്ഥാ വ്യതിയാന പ്രതിഭാസങ്ങളെ തീർത്തും ഇല്ലാതാക്കുന്നവയല്ല; മറിച്ച് കാലാസ്ഥാ വ്യതിയാന ആഘാതങ്ങൾ പ്രതിരോധിക്കാനുള്ള ചില സങ്കേതങ്ങൾ മാത്രമാണ്.

എയർ കണ്ടീഷണറുകൾ സ്ഥാപിച്ച് ഇത്തരം സാഹചര്യങ്ങളെ മറികടക്കാം എന്നത് ഇതിനുള്ള ഉത്തരമാകുന്നില്ല. മറിച്ച്  ഫോസിൽ ഇന്ധനദഹനംവഴി കൂടുതൽ ഊർജ ഉപയോഗത്തിനുള്ള സാധ്യത വർധിപ്പിക്കുകയേ ഉള്ളു.  എയർകണ്ടീഷണറുകളുടെ ഉപയോഗം നഗര പ്രദേശങ്ങളിലെ താപനില വർധിപ്പിക്കുകയാണ്‌ യഥാർഥത്തിൽ ചെയ്യുന്നത്.  ഇതുവഴി ആഗോളതാപനം ഏറ്റുന്നതിലും ഒരു പങ്ക്‌ വഹിക്കുന്നു. അന്തരീക്ഷ താപനം ഉയരുന്നത്‌ പിടിച്ചുനിർത്താൻ  പ്രകൃത്യായുള്ള പ്രതിവിധികൾക്ക് കൂടുതൽ ഊന്നൽ നൽകുന്നതാണ് അഭികാമ്യം. പാർക്കുകൾ, ഉദ്യാനങ്ങൾ എന്നിവയിൽ വൃക്ഷങ്ങൾ കൂടുതലായി വച്ചുപിടിപ്പിക്കുകവഴി നഗരാന്തരീക്ഷം അൽപ്പമെങ്കിലും തണുപ്പിക്കാവുന്നതാണ്.

(ലേഖകൻ കേരള കാർഷിക സർവകലാശാലയിലെ കാലാവസ്ഥാ വ്യതിയാന പഠന ഗവേഷണ അക്കാദമിയിലെ സയന്റിഫിക്‌ ഓഫീസറാണ്‌)
 

പ്രധാന വാർത്തകൾ
Top