21 November Wednesday

ഡയോണിയിലെ ശിലാരേഖകള്‍ ഭൗമേതര ജീവന്റെയോ..?

സാബു ജോസ്‌Updated: Thursday Nov 8, 2018

സൗരയൂഥത്തിൽ ജീവന്റെ അടയാളങ്ങൾ ലഭിക്കാൻ സാധ്യതയുള്ള ഒരു പ്രദേശംകൂടി. ചൊവ്വ, ടൈറ്റൻ, യൂറോപ, എൻസിലാഡസ് എന്നിവയുടെ ശ്രേണിയിലേക്ക് ഡയോണിയും വരുന്നു.

സൗരയൂഥത്തിൽ ജീവന്റെ അടയാളങ്ങൾ ലഭിക്കാൻ സാധ്യതയുള്ള ഒരു പ്രദേശംകൂടി കണ്ടെത്തിയിരിക്കുന്നു. ശനി ഗ്രഹത്തിന്റെ ഉപഗ്രഹമായ ഡയോണിയാണ‌് ജീവൻ തുടിക്കുന്നതായി ശാസ്ത്രലോകം സംശയിക്കുന്ന ഇടം. കസീനി ബഹിരാകാശപേടകത്തിൽനിന്ന് ലഭിച്ച വിവരങ്ങൾ അപഗ്രഥിച്ച സ്മിത്സോണിയൻ നാഷണൽ എയർ ആൻഡ‌് സ്പേസ് മ്യൂസിയത്തിലെ (വാഷിങ്ടൺ) ഗവേഷകയായ എമിലി മാർട്ടിനും സഹപ്രവർത്തകരുമാണ് ഈ വാർത്ത പുറത്തുവിട്ടിരിക്കുന്നത്. ഗവേഷണറിപ്പോർട്ട് ജിയോഫിസിക്കൽ റിസർച്ച് ലെറ്റേഴ്സ് ഓൺലൈൻ മാഗസിനിൽ കഴിഞ്ഞ ഒക്ടോബർ 15ന് പ്രസിദ്ധീകരിച്ചിട്ടുണ്ട്.

ഡയോണി ഉപഗ്രഹത്തിന്റെ മധ്യരേഖയ്ക്ക് സമാന്തരമായി കാണപ്പെടുന്ന, ശിലാലിഖിതങ്ങൾക്കുസമാനമായ രേഖകൾ സൗരയൂഥത്തിൽ മറ്റൊരു ഉപഗ്രഹത്തിലും കണ്ടിട്ടില്ലാത്തതാണ്. പത്തുമുതൽ 100 കിലോമീറ്റർവരെ ദൈർഘ്യവും അഞ്ചു കിലോമീറ്റർ വീതിയുമുള്ള ഈ രേഖകൾ ഒരു റൂളർ ഉപയോഗിച്ച് വരച്ചതുപോലെ കൃത്യമാണ്. ശനിയുടെ വലയങ്ങളിൽനിന്ന് വർഷിച്ച പൊടിപടലങ്ങളും ഹെലൻ, പോളിഡ്യൂസസ് എന്നീ ഉപഗ്രഹങ്ങളിൽനിന്നുള്ള ഉൽക്കാ സമാന ശകലങ്ങളുടെ വർഷവും ഇതിന് കാരണമാകാമെങ്കിലും കൃത്യമായ അകലം പാലിച്ച് സമാന്തരമായി ഉണ്ടാകുന്ന രേഖകളുടെ കാരണം ഇനിയും വിശദീകരിക്കപ്പെടേണ്ടതുണ്ട്.

ഡയോണിയുടെ ഉപരിതലത്തിലെ ഉറച്ച ഹിമപാളികൾക്കടിയിലുള്ള ജലത്തിലുള്ള ജീവന്റെ അടയാളങ്ങളാണിതെന്നും ശാസ്ത്രജ്ഞർ സംശയിക്കുന്നുണ്ട്. കസീനി ഉപഗ്രഹത്തിൽനിന്ന് ലഭിച്ച വിവരങ്ങളുടെ വിശദമായ പരിശോധനകൾക്കുശേഷമേ അക്കാര്യം വ്യക്തമാവുകയുള്ളൂ. അതെന്തായാലും സൗരയൂഥത്തിൽ ഭൂമിക്ക് വെളിയിൽ ജീവന് സാധ്യതയുള്ള ദ്രവ്യപിണ്ഡങ്ങളുടെ ശ്രേണിയിലേക്ക് പുതിയ ഒരു അതിഥികൂടി എത്തിച്ചേർന്നു. ഭൗമേതര ജീവൻ തിരയുന്ന എക്സോബയോളജിസ്റ്റുകൾക്ക് ആവേശം പകരുന്നതാണ് ഈ പുതിയ കണ്ടെത്തൽ. ചൊവ്വ, ടൈറ്റൻ, യൂറോപ, എൻസിലാഡസ് എന്നിവയുടെ ശ്രേണിയിലേക്ക് ഡയോണിയും വരുന്നു. ഡയോണിയുടെ ഉപരിതലത്തിൽ കാണപ്പെടുന്ന ഈ ദുരൂഹ രേഖകളുടെ വിശദീകരണം കസീനി പേടകത്തിൽനിന്ന് ലഭിച്ച വിവരങ്ങളുടെ വിശകലനത്തിലൂടെ ലഭിക്കുമെന്നാണ് ശാസ്ത്രജ്ഞർ പ്രതീക്ഷിക്കുന്നത്. 2017ൽ പ്രവർത്തനം അവസാനിപ്പിച്ച ബഹിരാകാശപേടകമാണ് കസീനി. ശനി ഗ്രഹത്തിന്റെ ഉപഗ്രഹങ്ങളേക്കുറിച്ച് പഠിക്കാനായി വിക്ഷേപിച്ച ഈ ഉപഗ്രഹത്തിൽനിന്ന് ലഭിച്ച വിവരങ്ങൾ അപഗ്രഥിച്ച‌് തുടങ്ങിയിട്ടേയുള്ളൂ. ഒരുപക്ഷേ, ഔട്ടർ സോളാർ സിസ്റ്റത്തിലേക്ക് വിക്ഷേപിച്ച ഏറ്റവും വിജയകരമായ ബഹിരാകാശദൗത്യമായിരിക്കും കസീനി.

ഡയോണിയുടെ സവിശേഷതകൾ
1684ൽ ഇറ്റാലിയൻ ജ്യോതിശാസ്ത്രജ്ഞനായ ഡൊമനിക്കോ കസീനിയാണ് ശനിയുടെ ഉപഗ്രഹമായ ഡയോണി കണ്ടെത്തിയത്. ഗ്രീക്ക് പുരാണത്തിലെ പാതാള ദേവതയായ ഡയോണിയുടെ പേരാണ് ഈ ഉപഗ്രഹത്തിന് നൽകിയത്. സാറ്റേൺ4 എന്നൊരു പേരും ഈ ഉപഗ്രഹത്തിനുണ്ട്. 1122 കിലോമീറ്റർ വ്യാസമുള്ള ഡയോണി സൗരയൂഥത്തിൽ വലുപ്പത്തിൽ 15ാം സ്ഥാനത്തുള്ള ഉപഗ്രഹമാണ്. അതുമാത്രമല്ല ഡയോണിയുടെ പ്രത്യേകത. സൗരയൂഥത്തിൽ ഡയോണിയേക്കാൾ ചെറുതായ ഉപഗ്രഹങ്ങളുടെ എല്ലാം പിണ്ഡം ചേർത്തുവച്ചാലും ഡയോണിക്ക് തുല്യമാകില്ല. ഡയോണിയുടെ പിണ്ഡത്തിന്റെ മുന്നിൽ രണ്ടു ഭാഗവും ഉറച്ച് കട്ടിയായ ജലമാണ്. ബാക്കിയുള്ള ഭാഗം ഈ ഉപഗ്രഹത്തിന്റെ കോർ ആണ്. അത് നിർമിക്കപ്പെട്ടിരിക്കുന്നത് സിലിക്കേറ്റ് പാറകൾകൊണ്ടാണ്. ഉപരിതല പാളികൾക്കിടയിൽ ജലസമുദ്രത്തിന്റെ സാന്നിധ്യം സ്ഥിരീകരിച്ചിട്ടുണ്ട്.

ശനിയുടെ ഉപഗ്രഹമായ എൻസിലാഡസിൽമാത്രമാണ് ഇതിനുമുമ്പ‌് ജലസാന്നിധ്യം സ്ഥിരീകരിക്കപ്പെട്ടിട്ടുള്ളത്. 99 മുതൽ 122 കിലോമീറ്റർവരെ കട്ടിയുള്ള ഹിമപാളികൾകൊണ്ട് മൂടിയിരിക്കുകയാണ് ഡയോണിയുടെ ഉപരിതലം. അതിനുകീഴെ 65 മുതൽ 95 കിലോമീറ്റർവരെ ആഴമുള്ള സമുദ്രങ്ങളുമുണ്ട്. ഭൂമിയിലെ സമുദ്രങ്ങളുടെ ഏറ്റവും കൂടിയ ആഴം 11 കിലോമീറ്റർമാത്രമാണെന്നതും ശ്രദ്ധിക്കുക. ജലം ജീവന്റെ ഗർഭഗൃഹമാണെങ്കിൽ ഡയോണിയിൽ ജീവന്റെ സാധ്യത വളരെയേറെയാണ്.

39,65,000 ചതുരശ്ര കിലോമീറ്റർ ഉപരിതല വിസ്തീർണമുള്ള ഡയോണിയുടെ ഗുരുത്വാകർഷണബലം കേവലം 0.232 m/s2   മാത്രമാണ്. ഡയോണിയുടെ ഭ്രമണകാലം 2.74 ഭൗമദിനങ്ങളാണ്. ഭ്രമണപഥത്തിന് അൽപ്പംപോലും ചരിവില്ല. ശരാശരി ഉപരിതല ഊഷ്മാവ് –-186 ഡിഗ്രി സെൽഷ്യസാണ്. ഇത്രയും താഴ‌്ന്ന താപനിലയിൽ എങ്ങനെയാണ് ദ്രാവകാവസ്ഥയിൽ ജലം നിലനിൽക്കുന്നത് എന്ന സംശയം സ്വാഭാവികമാണ്. ഉറച്ചുകട്ടിയായ ഉപരിതലത്തിനുകീഴെയുള്ള ജലത്തിന് ദ്രാവകാവസ്ഥയിൽ നിലനിൽക്കുന്നതിന‌് ആവശ്യമായ താപം പകരുന്നത് മാതൃഗ്രഹമായ ശനിയുടെ ശക്തമായ വേല ബലമാണ്.

1980ൽ നാസയുടെ വോയേജർ സ്പേസ്ക്രാഫ്റ്റ് ഡയോണിയുടെ സമീപത്തുകൂടി സഞ്ചരിച്ചിരുന്നു. ഡയോണിയുടെ ഉപരിതല സവിശേഷതകൾ സംശയാസ്പദവും ദുരൂഹവുമെന്നാണ് വോയേജർ അടയാളപ്പെടുത്തിയത്. എന്നാൽ, വോയേജർ ദൗത്യത്തിന്റെ ലക്ഷ്യം ശനിയുടെ ഉപഗ്രഹങ്ങളല്ലാത്തതുകൊണ്ട് ഡയോണിയിൽ കൂടുതൽ നിരീക്ഷണം നടത്തിയില്ല. എങ്കിലും ഡയോണിയിൽ ഭൂമിയിലേതുപോലെ അഗ്നിപർവതങ്ങൾ ഉണ്ടാകാനുള്ള സാധ്യതയുണ്ടെന്ന് വോയേജർ ദൗത്യം സൂചന നൽകിയിട്ടുണ്ട്. അഗ്നിപർവതങ്ങൾ ആന്തര ഊർജ വിനിമയത്തെ സുഗമമാക്കുകയും ദ്രവ്യപിണ്ഡത്തെ സജീവമാക്കുകയും ചെയ്യും. ഇത്തരം ഇടങ്ങളിലാണ് ജീവൻ ഉദ്ഭവിക്കുകയും നിലനിൽക്കുകയും ചെയ്യുന്നത്.

2015 ആഗസ‌്ത‌് 17ന് കസീനി ബഹിരാകാശപേടകം ഡയോണിയുടെ ഉപരിതലത്തിൽനിന്ന‌് 500 കിലോമീറ്റർമാത്രം ഉയരത്തിൽനിന്നെടുത്ത ചിത്രങ്ങളാണ് സ്മിത്സോണിയൻ നാഷണൽ എയർ ആൻഡ‌് സ്പേസ് മ്യൂസിയത്തിലെ ഗവേഷകരുടെ പുതിയ കണ്ടെത്തലിന് ആധാരമായിട്ടുള്ളത്. കുന്നുകളും സമതലങ്ങളും താഴ‌്‌വാരങ്ങളും നിറഞ്ഞ ഡയോണിയിൽ 100 കിലോമീറ്റർവരെ വ്യാസമുള്ള ഉൽക്കാ ഗർത്തങ്ങളും കണ്ടെത്തിയിട്ടുണ്ട്. ഗുരുത്വാകർഷണബലം തുലോം കുറവായതുകൊണ്ട് ഡയോണിയുടെ അന്തരീക്ഷം നാമമാത്രമാണ്. എങ്കിലും ജലം വിഘടിക്കപ്പെടുന്നതുകൊണ്ട് ഗണ്യമായ തോതിൽ ഓക്സിജനും ഹൈഡ്രജനും സ്വതന്ത്രമാക്കപ്പെടുന്നുണ്ട്. ഒരു ക്യൂബിക് സെന്റിമീറ്ററിൽ 0.09 വരെയാണ് അന്തരീക്ഷത്തിലുള്ള ഓക്സിജൻ തന്മാത്രകളുടെ തോത്. ഓക്സിജനും ഹൈഡ്രജനും ജലവും ധാരാളമായുള്ള ഡയോണിയിൽ ജീവന്റെ സാധ്യത വളരെയേറെയാണ്.


പ്രധാന വാർത്തകൾ
Top