ജൈവകൃഷിയില്‍ അനുവര്‍ത്തിക്കുന്ന സസ്യരോഗനിയന്ത്രണമാര്‍ഗങ്ങളിലൊന്നാണ് സൂര്യതാപീകരണം അഥവാ സോളറൈസേഷന്‍. ഉഷ്ണമേഖലാ പ്രദേശങ്ങളില്‍ ഇതിന്റെ സാധ്യതയും ഗുണഫലവും ഏറെയാണ്. എങ്കിലും ഇതിന് വേണ്ടത്ര പ്രചാരം ലഭിച്ചുതുടങ്ങിയിട്ടില്ലെന്നതാണു സത്യം. നേഴ്സറികളിലും പച്ചക്കറിവിളകളിലും ഇഞ്ചി, മഞ്ഞള്‍ തുടങ്ങിയ വിളകളിലും രോഗകാരികളെ നിയന്ത്രിക്കുന്നതിന് ഈ രീതി ഫലപ്രദമാണെന്നു തെളിഞ്ഞിട്ടുണ്ട്. മണ്ണിലെ സാധാരണ താപനിലയില്‍നിന്ന് 10-120സെല്‍ഷ്യസ് ഈ പ്രവൃത്തിവഴി വര്‍ധിക്കുകയും രോഗകാരികളായ സൂക്ഷ്മജീവികളും കളകളും നശിപ്പിക്കപ്പെടുകയുംചെയ്യുന്നു.

സസ്യങ്ങള്‍ക്ക് രോഗകാരികളായ അനേകം കുമിളുകളുടെ വളര്‍ച്ചയെയും ഇതുവഴി നിയന്ത്രിക്കപ്പെടുന്നു. സൂര്യതാപീകരണം എങ്ങനെ സൂര്യപ്രകാശം ഏറ്റവും കൂടുതല്‍ ലഭ്യമാവുന്ന സമയമാണ് ഇതിനുയോജ്യം. സുതാര്യമായ പ്ലാസ്റ്റിക് ഷീറ്റുകള്‍കൊണ്ട്ഈര്‍പ്പമുള്ള മണ്ണിനുമുകളില്‍ പുതയിടുകയാണു ചെയ്യുന്നത്. പുതയിടുന്നതിനുമുമ്പ് മണ്ണില്‍ ആവശ്യത്തിന് ഈര്‍പ്പമുണ്ടെന്ന് ഉറപ്പാക്കണം. ഇങ്ങനെ പുതയിടല്‍ നടത്തിയ സ്ഥലത്തുനിന്ന് 20-30 ദിവസത്തിനകം പോളിത്തീന്‍ഷീറ്റ് മാറ്റി കൃഷിചെയ്യാം. പുതയിടുന്നതിന് 100-150 ഗേജുള്ള പ്ലാസ്റ്റിക് ഷീറ്റാണ് ഉപയോഗിക്കുന്നത്. നേഴ്സറി ഉണ്ടാക്കാന്‍ ഉദ്ദേശിക്കുന്ന സ്ഥലം കിളച്ച് കല്ലും കട്ടയും മാറ്റി നിരപ്പാക്കി ആവശ്യാനുസരണം ജൈവവളം ചേര്‍ത്ത് തടം തയ്യാറാക്കി ഒരു ചതുരശ്രമീറ്ററിന് അഞ്ചുലിറ്റര്‍ ക്രമത്തില്‍ നച്ചശേഷം മേല്‍പ്പറഞ്ഞ പ്രകാരമുള്ള പോളിത്തീര്‍ ഷീറ്റ്കൊണ്ട് മൂടണം. കാറ്റില്‍ നീങ്ങിപ്പോകാതിരിക്കാനും വായുകടക്കാതിരിക്കാനുമായി അരികില്‍ മണ്ണിട്ടുമൂടണം. പുതയിട്ട പ്ലാസ്റ്റിക്കിനടിയില്‍ വായുഅറകളില്ലെന്ന് ഉറപ്പുവരുത്തണം. 20-30 ദിവസം കഴിഞ്ഞ് ഷീറ്റ് മാറ്റി കൃഷിചെയ്യാം. പ്രധാന കൃഷിയിടത്തിലാണ് ഈ രീതി അനുവര്‍ത്തിക്കുന്നതെങ്കില്‍ പല പ്രധാന രോഗങ്ങളെയും നിയന്ത്രിക്കാം. പ്രധാന കൃഷിയിടം കിളച്ച് കല്ലും കട്ടയും മാറ്റി തടമെടുത്ത് ആവശ്യാനുസരണം ജൈവവളം ചേര്‍ത്ത് ആവശ്യമായ ഈര്‍പ്പം നല്‍കി പോളിത്തീന്‍ഷീറ്റ്കൊണ്ടു മൂടണം. 30 ദിവസത്തിനുശേഷം വിത്ത്/ചെടി നടാം. പോര്‍ട്ടിങ് മിശ്രിതം തയ്യാറാക്കി തറയില്‍ 15-20 സെ. മീറ്റര്‍ കനത്തില്‍ നിരത്തിയശേഷം റോസ്കാന്‍ ഉപയോഗിച്ച് നച്ചശേഷം പോളിത്തീന്‍ഷീറ്റ്കൊണ്ടു മൂടണം. 30 ദിവസത്തിനുശേഷം ഈ പോര്‍ട്ടിങ് മിശ്രിതം പോളിത്തീന്‍ ബാഗുകളിലേക്കു മാറ്റി അതില്‍ തൈകള്‍ നട്ടുപരിപാലിക്കാം.

സൂര്യതാപീകരണത്തിനായി തെരഞ്ഞെടുക്കുന്ന സ്ഥലം തുറസ്സായതും നല്ലതുപോലെ കിളച്ചതും മണ്ണ് പൊടിരൂപത്തിലുള്ളതുമായിരിക്കണം. വേനല്‍മഴ ശ്രദ്ധിക്കണം. വേനല്‍മഴ നിമിത്തം തടത്തില്‍ വെള്ളം ഒഴുകിയെത്തുകയോ, തടം കെട്ടിനില്‍ക്കുകയോ ചെയ്യരുത്. കൂടുതല്‍ രോഗകാരികളായ അണുക്കള്‍ മണ്ണിനടിയില്‍ ആഴത്തിലുണ്ടെങ്കില്‍ 30 ദിവസമെന്നത് അറുപതോ അറുപത്തഞ്ചോ ദിവസമായി മാറ്റാം. പിത്തിയം, ഫ്യൂസേറിയം, ഫൈറ്റോഫ്തോറ, റൈസോക്ടോണിയ തുടങ്ങിയ രോഗകാരികളായ കുമിളുകളുടെ വളര്‍ച്ച നിയന്ത്രിക്കുന്നതിനും നിമ വിരകളുടെ നിയന്ത്രണത്തിനും കളകളെ ഫലപ്രദമായി നിയന്ത്രിക്കുകവഴി ഉല്‍പ്പാദനവര്‍ധനയ്ക്കും ചെടികളുടെ വളര്‍ച്ചനിരക്ക് കൂട്ടാനും ഇതുവഴി സാധിക്കും.