Top
18
Saturday, November 2017
About UsE-Paper

178 ഉല്‍പ്പന്നങ്ങളുടെ നികുതി കുറച്ചു ; ഹോട്ടല്‍ ഭക്ഷണത്തിന് ജിഎസ്ടി 5%

Saturday Nov 11, 2017
സ്വന്തം ലേഖകന്‍

ന്യൂഡല്‍ഹി > പഞ്ചനക്ഷത്ര ഹോട്ടലുകള്‍ ഒഴികെയുള്ള എല്ലാ ഭക്ഷണശാലയിലും നികുതി അഞ്ചു ശതമാനമായി കുറയ്ക്കാന്‍ ഗുവാഹത്തിയില്‍ ചേര്‍ന്ന ജിഎസ്ടി കൌണ്‍സില്‍ യോഗം തീരുമാനിച്ചു. ദിവസ മുറിവാടക 7500 രൂപയില്‍ കൂടുതലുള്ള നക്ഷത്ര ഹോട്ടലുകളില്‍ റസ്റ്റാറന്റുകളിലെ ഭക്ഷണത്തിനുള്ള നികുതി 18 ശതമാനമായി തുടരും. കാറ്ററിങ് വഴി പുറത്തുനല്‍കുന്ന ഭക്ഷണത്തിനും 18 ശതമാനം നികുതി നിലനില്‍ക്കും.

അലക്കുപൊടി, ഗ്രാനൈറ്റ്, മാര്‍ബിള്‍, ചോക്കലേറ്റ് എന്നിവയടക്കം 178 ഉല്‍പ്പന്നങ്ങളുടെ നികുതി 28 ല്‍ നിന്ന് 18 ശതമാനമാക്കി. വാച്ച്, ബ്ളേഡ്, സ്റ്റൌവ്, ചൂയിങ്ഗം, പോഷകപാനീയങ്ങള്‍, സൌന്ദര്യവര്‍ധക വസ്തുക്കള്‍, ടൂത്ത് പേസ്റ്റ്, ലോഷന്‍, ഷൂ പോളിഷ് എന്നിവയും ഈ പട്ടികയില്‍പ്പെടും. ഇനി 50 ഉല്‍പ്പന്നങ്ങള്‍ക്കാണ് 28 ശതമാനം നികുതി. വാഹനങ്ങള്‍, സ്പെയര്‍ പാര്‍ട്സ്, വാഷിങ് മെഷീന്‍, എയര്‍ കണ്ടീഷണര്‍, സിമന്റ്, പെയിന്റ് തുടങ്ങിയവ 28 ശതമാനം ജിഎസ്ടി തുടരുന്ന ഉല്‍പ്പന്നങ്ങളില്‍പ്പെടും. പുതുക്കിയ നികുതി 15നു നിലവില്‍വരും.

നിരക്ക് കുറച്ചതോടെ  പ്രതിവര്‍ഷം നികുതിവരുമാനത്തില്‍ 20,000 കോടി രൂപയുടെ കുറവ് വരുമെന്നാണ് സര്‍ക്കാര്‍ കണക്ക്. കൌണ്‍സില്‍ യോഗത്തില്‍ ബിഹാര്‍ ഉപമുഖ്യമന്ത്രി സുശീല്‍കുമാര്‍ മോഡിയാണ് നികുതി കുറയ്ക്കാനുള്ള തീരുമാനം അറിയിച്ചത്. ജിഎസ്ടി നിരക്കുകള്‍ പുനഃപരിശോധിക്കാന്‍ നിയോഗിച്ച ഉപസമിതി ശുപാര്‍ശയുടെ അടിസ്ഥാനത്തിലാണ് തീരുമാനം. ചെറുകിട വ്യവസായമേഖലയില്‍ നിര്‍മിക്കുന്ന ഇരുനൂറോളം ഉല്‍പ്പന്നങ്ങള്‍ക്ക് നികുതിയിളവ് നല്‍കാനായിരുന്നു ശുപാര്‍ശ.
ചെറുകിട വ്യവസായമേഖലയില്‍ ജിഎസ്ടി സൃഷ്ടിച്ച പ്രതിസന്ധി ഗുജറാത്തില്‍ തെരഞ്ഞെടുപ്പ് വിഷയമായ സാഹചര്യത്തിലാണ് സര്‍ക്കാരിന്റെ നടപടി. ഡിസംബര്‍ ഒമ്പത്, 14 തീയതികളിലാണ് ഗുജറാത്ത് വോട്ടെടുപ്പ്. നികുതി നിര്‍ണയത്തിലെ അപാകതകളോട് ഇതുവരെ കേന്ദ്രം മുഖംതിരിച്ചുനില്‍ക്കുകയായിരുന്നു.