22 September Saturday

പലിശബാധ്യത കുറയ്ക്കാന്‍ ഹോം സേവര്‍ വായ്പകള്‍

കെ അരവിന്ദ്Updated: Sunday Sep 27, 2015

ഭവനവായ്പ പലര്‍ക്കും ജോലിചെയ്യുന്ന കാലംമുഴുവന്‍ നീണ്ടുനില്‍ക്കുന്ന ബാധ്യതയാണ്. 35-40 വയസ്സിലെടുക്കുന്ന ഭവനവായ്പ തിരിച്ചടയ്ക്കാന്‍ ജോലിയിലെ ശേഷിക്കുന്ന കാലംമുഴുവന്‍ വേണ്ടിവരും. പലിശനിരക്ക് ഉയരുമ്പോള്‍ വായ്പാ കാലയളവ് വര്‍ധിക്കുകയും അത് വായ്പാബാധ്യത വര്‍ധിപ്പിക്കുകയും ചെയ്യും. അത്യാവശ്യങ്ങള്‍ക്കായി നീക്കിവച്ച തുക ഉപയോഗിച്ച് വായ്പാതുക ഭാഗികമായി തിരിച്ചടയ്ക്കാമെന്നുവച്ചാല്‍ അടിയന്തരഘട്ടങ്ങളില്‍ സാമ്പത്തികപ്രതിസന്ധി നേരിടേണ്ടിവരും. എന്നാല്‍ അത്തരക്കാര്‍ക്ക് അത്യാവശ്യങ്ങള്‍ക്കായി നീക്കിവച്ച തുക ഉപയോഗിച്ച് വായ്പാബാധ്യത കുറയ്ക്കുന്നതിനുള്ള പദ്ധതിയാണ് ഹോം സേവര്‍ വായ്പ.

ഉപയോക്താവിന്റെ കൈവശമുള്ള സമ്പാദ്യം ഒരു കറന്റ് അക്കൗണ്ടില്‍ നിക്ഷേപിക്കുകയും ഈ അക്കൗണ്ട് ഭഭവനവായ്പാ അക്കൗണ്ടുമായി ബന്ധിപ്പിക്കുകയുമാണ് ഹോം സേവര്‍ വായ്പാ പദ്ധതിയില്‍ ചെയ്യുന്നത്. ഈ പദ്ധതിയില്‍ അടച്ചുതീര്‍ക്കാന്‍ ബാക്കിയുള്ള വായ്പാ തുകയില്‍നിന്ന് കറന്റ് അക്കൗണ്ടിലെ തുക കിഴിച്ചശേഷമുള്ള തുകയ്ക്കാണ് പലിശ കണക്കാക്കുക. ഏതാനും ബാങ്കുകള്‍ ഇത്തരത്തിലുള്ള പദ്ധതികള്‍ ആവിഷ്കരിച്ചിട്ടുണ്ട്.ഇത് എങ്ങിനെ പ്രവര്‍ത്തിക്കുന്നുവെന്നു നോക്കാം. 10.5 ശതമാനം പലിശനിരക്കില്‍ 25 ലക്ഷം രൂപയുടെ ഭവനവായ്പ 20 വര്‍ഷത്തേക്ക് എടുത്ത ഒരാളുടെ ആദ്യത്തെ മാസത്തെ തുല്യ മാസഗഡു 24,959 രൂപയാകും.

ഇതില്‍ 21,875 രൂപ പലിശയിനത്തിലേക്കും 3084 രൂപ മൂലധനത്തിലേക്കുമാണ്. അതായത്, രണ്ടാമത്തെ മാസം ബാക്കിയുള്ള മൂലധനം 24,98,673 രൂപ. അതേസമയം ഹോം സേവര്‍ ലോണ്‍ സ്കീം അനുസരിച്ച് അഞ്ചു ലക്ഷം രൂപ കറന്റ് അക്കൗണ്ടില്‍ നിക്ഷേപിക്കുന്നുവെന്നിരിക്കട്ടെ. വായ്പാതുക 25 ലക്ഷം രൂപയില്‍നിന്ന് 20 ലക്ഷം രൂപയായി കുറയുകയും ആ തുകയുടെ അടിസ്ഥാനത്തില്‍ പലിശ കണക്കാക്കുകയുമാണ് ചെയ്യുക. പലിശ 10.5 ശതമാനത്തില്‍നിന്ന് 11 ശതമാനമായി വര്‍ധിക്കുകയും തുല്യ മാസസഗഡു 25,804 രൂപയായി വര്‍ധിക്കുകയും ചെയ്യുമെങ്കിലും ബാക്കിയുള്ള വായ്പാ കാലയളവ് 136 മാസമായി കുറയും. ഇതുവഴി മൊത്തം വായ്പാ കാലയളവില്‍ പലിശയിനത്തില്‍ 19,69,401 രൂപ ലാഭിക്കാന്‍ സാധിക്കും. കൈവശമുള്ള തുക ഉപയോഗിച്ച് വായ്പ ഭഭാഗികമായി തിരിച്ചടയ്ക്കുന്നതിന് പകരം ഈ തുക മറ്റൊരു അക്കൗണ്ടില്‍ നിക്ഷേപിക്കുകയും അതുവഴി പലിശയിനത്തിലുള്ള ബാധ്യത കുറയ്ക്കുകയും ചെയ്യാമെന്നതാണ് ഈ സ്കീമിന്റെ മേന്മ.

കറന്റ് അക്കൗണ്ടിലെ പ്രതിമാസ ശരാശരി കണക്കാക്കിയാണ് ഓരോ മാസത്തെയും ബാക്കിയുള്ള വായ്പാ തുകയും അതിനുസരിച്ച് പലിശയും കണക്കാക്കുക. കറന്റ് അക്കൗണ്ടിലെ തുക എപ്പോള്‍ വേണമെങ്കിലും പിന്‍വലിക്കാം. തുക പിന്‍വലിക്കുന്നതിനുസരിച്ച് ബാക്കിയുള്ള വായ്പാ തുകയിലും വായ്പാ കാലയളവിലും വ്യത്യാസം ഉണ്ടാകും. വായ്പാബാധ്യത കുറയുമെങ്കിലും ഹോം സേവര്‍ പദ്ധതികള്‍ക്ക് അവയുടേതായ ന്യൂനതകളുമുണ്ട്. ഹോം സേവര്‍ വായ്പാ അക്കൗണ്ടുകളുടെ വാര്‍ഷിക പലിശ സാധാരണ ഭഭവനവായ്പകളെക്കാള്‍ 0.5-1 ശതമാനം കൂടുതലാണ്. കറന്റ് അക്കൗണ്ടിലെ തുകയ്ക്ക് പലിശയൊന്നും ലഭിക്കുകയുമില്ല. കറന്റ് അക്കൗണ്ടിലെ പലിശ മ്യൂച്വല്‍ ഫണ്ടുകളിലോ ഓഹരികളിലോ നിക്ഷേപിക്കുകയാണെങ്കില്‍ പലിശയിനത്തില്‍ ലാഭിക്കുന്ന തുകയെക്കാള്‍ മികച്ച നേട്ടം ഉണ്ടാക്കാന്‍ സാധിച്ചുവെന്നുവരാം. &ഹറൂൗീ;പണലഭ്യത പ്രധാനമായി കാണുന്നവര്‍ക്ക്് ഹോം സേവര്‍ വായ്പാപദ്ധതി പ്രയോജനപ്പെടുത്താം. അടിയന്തര ഘട്ടങ്ങളില്‍ ഉപയോഗിക്കുന്നതിനായി എപ്പോള്‍ വേണമെങ്കിലും പിന്‍വലിക്കാവുന്ന രീതിയില്‍ സേവിങ്സ് അക്കൗണ്ടില്‍ തുക നിക്ഷേപിക്കുന്നവര്‍ക്ക് ഹോം സേവര്‍ വായ്പാ പദ്ധതി തെരഞ്ഞെടുക്കുന്നത് നന്നാകും.

പ്രധാന വാർത്തകൾ
Top