24 September Monday

മുതലകളുടെ കളിത്തോഴൻ

Monday Feb 19, 2018
ശതമന്യ‍ു


നരേന്ദ്ര മോഡി ബാല്യകാലത്ത് മുതലകളോട് പൊരുതിയാണ് വളർന്നത്. ബാലനായിരുന്ന മോഡി മുതലകളുമായി ദ്വന്ദ്വയുദ്ധത്തിലേർപ്പെട്ടിരുന്നു. കൂട്ടുകാരുമൊത്ത് സ്വദേശമായ വഡ്നഗറിലെ ശർമിഷ്ഠ തടാകത്തിൽ നീന്തിക്കളിക്കുമ്പോൾ മോഡി എപ്പോഴും മുതലക്കുഞ്ഞുങ്ങൾക്ക് പിന്നാലെയായിരുന്നത്രേ. കൗമാരപ്രായമായപ്പോഴേക്കും കുളത്തിൽ നാൽപ്പതിലേറെ മുതലകളുണ്ടായിരുന്നു. ഒരു ദിവസം മോഡി ഒരു മുതലക്കുഞ്ഞിനെ പിടിച്ച് വീട്ടിൽ കൊണ്ടുപോയി. മുതലക്കുഞ്ഞുമായി വീട്ടിലെത്തിയ മോഡിക്ക് അമ്മ ഹീര ബെന്നിന്റെ കൈയിൽനിന്ന് കണക്കിന് കിട്ടി. കുഞ്ഞുങ്ങളെ അമ്മയിൽനിന്ന് അകറ്റിയാലുണ്ടാകാവുന്ന ഭവിഷ്യത്തുകളെക്കുറിച്ച് മോഡിയെ അമ്മ പറഞ്ഞു മനസ്സിലാക്കി. അമ്മ പറഞ്ഞതനുസരിച്ച് മുതലക്കുഞ്ഞിനെ തടാകത്തിൽ തിരികെ കൊണ്ടുവിട്ടു‐ നരേന്ദ്ര ദാമോദർ മോഡി ഒരതിമാനുഷനാണെന്ന് തെളിയിക്കാൻ ഈ കഥ ധാരാളം മതി. സ്റ്റീവ് ഇർവിനുപോലും സാധിക്കാത്ത ഈ പ്രകടനം ബാൽ നരേന്ദ്ര എന്ന പുസ്തകത്തിലൂടെ േലാകത്തിനുമുന്നിലുണ്ട്. മോഡിയുടെ കുട്ടിക്കാലസുഹൃത്ത് പ്രത്യക്ഷപ്പെട്ട് സാക്ഷ്യപ്പെടുത്തിയിട്ടുമുണ്ട്. ഡിഗ്രി സർട്ടിഫിക്കറ്റും കോളേജ് വിദ്യാഭ്യാസവുമെല്ലാം ദുരൂഹതയിലാണെങ്കിലും മുതലകളോട് മല്ലടിച്ചവനായിരുന്നു നരേന്ദ്ര മോഡി എന്നതിൽ സ്വയം സേവകർക്ക് ഒരു സംശയവുമില്ല. അത്തരം കൂട്ട് ഇന്നും തുടരുന്നു എന്നതിലാണ് മോഡി എന്ന അത്ഭുതത്തിന്റെ കരുത്ത്. പ്രധാനമന്ത്രിയായ മോഡിയുടെ ചിറകിനടിയിൽ സുരക്ഷ കണ്ടെത്തുന്നവർ ഒന്നും രണ്ടുമല്ല. നീരവ് മോഡി. വിജയ് മല്യ, ജയ് ഷാ, റിതികാ അവസ്തി, ലളിത് മോഡി‐ ഇങ്ങനെ എത്രയെത്ര പാവങ്ങളെയാണ് മോഡി രക്ഷിച്ചത്.

ഇതൊന്നും ആരും മനസ്സിലാക്കുന്നില്ല എന്നതിലാണ് സങ്കടപ്പെടേണ്ടത്. രാജ്യത്ത് വൻ തട്ടിപ്പുകൾ നടത്തി വിദേശത്തേക്ക് ഒളിച്ചുകടന്ന കുറ്റവാളികളെ തിരിച്ചുകൊണ്ടുവരുന്നതിൽ കേന്ദ്ര സർക്കാരിന് ഉദാസീന മനോഭാവമെന്ന് സുപ്രീംകോടതിതന്നെ പറഞ്ഞത് അതുകൊണ്ടാണ്. വഞ്ചനക്കേസിൽപ്പെട്ട റിതികാ അവസ്തിയെന്ന വ്യവസായി ജാമ്യമെടുത്തശേഷം 2016 ജനുവരിയിൽ ബ്രിട്ടനിലേക്ക് പോയി. തിരിച്ചുവരാഞ്ഞപ്പോഴാണ് ചീഫ് ജസ്റ്റിസ് ദീപക് മിശ്രപോലും നരേന്ദ്ര മോഡി നയിക്കുന്ന ഗവൺമെന്റിനെ കുറ്റപ്പെടുത്തിയത്. മൂന്നരവർഷത്തിനുള്ളിൽ പരസ്യത്തിനായി 3755 കോടി രൂപ ചെലവിട്ടിട്ടും മോഡി സർക്കാരിനെ ആരും വിശ്വസിക്കാത്തത് നരേന്ദ്ര മോഡിയുടെ കുഴപ്പമല്ല.

അഴിമതി വളർത്താനും കള്ളപ്പണക്കാരെ സംരക്ഷിക്കാനും മോഡിസർക്കാർ മുന്നിലാണെന്ന് പലരും പറയുന്നുണ്ട്. ഐപിഎൽ  നായകൻ ലളിത് മോഡിക്ക് വിദേശയാത്രാനുമതി ലഭിക്കാൻ മോഡിജി ഇടപെട്ടിരുന്നില്ല. അന്ന് വിദേശമന്ത്രി സുഷ്മ സ്വരാജ് മാത്രമാണ് ഇടപെട്ടത്. ഇന്ത്യ ലുക്ക്ഔട്ട് നോട്ടീസ് പുറപ്പെടുവിച്ച ലളിത് മോഡിക്ക് സഹായം നൽകിയത് അദ്വാനിപക്ഷക്കാരിയായ സുഷ്മയായതുകൊണ്ട് നരേന്ദ്ര മോഡിയെ കുറ്റപ്പെടുത്താനാകില്ല. ലളിത് മോഡി അമിത് ഷായുടെയും നരേന്ദ്ര മോഡിയുടെയും ഇഷ്ടക്കാരനാണെന്നത് അക്ഷന്തവ്യമായ കുറ്റവുമല്ല.

2016 ഫെബ്രുവരിയിൽ രാജ്യസഭാംഗമായിരിക്കെയാണ് മദ്യരാജാവ്  വിജയ് മല്യ ഇന്ത്യൻ ബാങ്കുകളെ കബളിപ്പിച്ച് 9000 കോടിയുമായി വിദേശത്തേക്ക് മുങ്ങിയത്. ഇന്ത്യയെക്കുറിച്ച് അഭിമാനമുള്ള നല്ലൊരു മനുഷ്യനാണ് മല്ലയ്യ. അദ്ദേഹം ചെറിയ ചില തട്ടിപ്പ് നടത്തിയെങ്കിൽതന്നെ, സഹായം അർഹിക്കുന്നു എന്ന് മോഡിജിയുടെ കരുണാർദ്രമായ മനസ്സ് തീരുമാനിച്ചെങ്കിലും അതെങ്ങനെ തെറ്റാകും? 'ആറുവട്ടം' ബ്രിട്ടീഷുകാർക്ക് മാപ്പെഴുതിക്കൊടുത്ത് സ്വാതന്ത്ര്യപോരാട്ടം തുടർന്ന സവർക്കറിന്റെ പാരമ്പര്യമുള്ള  പാർടിയും മോഡിജിയും ഇന്ത്യക്കാരനായ ഒരു വ്യവസായിയുടെ ദുരന്തം രാജ്യസ്നേഹത്തിന്റെ അടിസ്ഥാനത്തിൽതന്നെ കണ്ട് പരിഹരിക്കേണ്ടതാണ്. മല്ലയ്യയെ അയച്ചത് ബ്രിട്ടനിലേക്കാണ് എന്നത് പ്രത്യേകം ശ്രദ്ധിക്കണം. എതിരാളികൾ പറയുന്നതുപോലെ ഒരു മോശക്കാരനാണ് മല്ലയ്യ എങ്കിൽ, ബ്രിട്ടൻ അനുഭവിക്കട്ടെ.

നീരവ് മോഡി എന്ന പേര് കേട്ടാൽ നരേന്ദ്ര മോഡിയുടെ മകനോ മറ്റോ ആണെന്ന് തോന്നും. നരേന്ദ്ര മോഡിക്ക് മക്കളില്ല. വിവാഹം ചെയ്ത യശോദാ ബെന്നിനെ മുതലയെ പിടിക്കുന്ന പ്രായത്തിൽതന്നെ ഉപേക്ഷിച്ചതാണ്. നീരവ്  മോഡി  മല്ലയ്യയേക്കാൾ പാവപ്പെട്ട ഗുജറാത്തിൽ വേരുള്ള ഒരു കല്ലുകച്ചവടക്കാരൻ. കല്ല് പലതരത്തിലുണ്ട്. നല്ല കല്ല് വിൽക്കുന്നതുകൊണ്ട് നീരവിന് ശത കോടീശ്വരനാകാൻ കഴിഞ്ഞു. കോടീശ്വരന്മാരിലും വേദനിക്കുന്നവരുണ്ട്. അവരുടെ കണ്ണീരൊപ്പുന്നത് ആർഷഭാരതസംസ്കാരത്തിന്റെ അഭേദ്യ ഭാഗമായ ഉത്തരവാദിത്തമാണ്.

രാജ്യത്തെ രണ്ടാമത്തെ പൊതുമേഖലാ ബാങ്കായ പഞ്ചാബ് നാഷണൽ ബാങ്കിൽനിന്ന് 11,346 കോടി രൂപയുടെ തട്ടിപ്പ് നടത്തി എന്ന താരതമ്യേന നിസ്സാരമായ കുറ്റംചെയ്ത് നിൽക്കവെയാണ്, സ്വിറ്റ്സർലൻഡിലെ ദാവോസിൽ ലോക സാമ്പത്തിക ഉച്ചകോടിയിൽ പങ്കെടുക്കാനെത്തിയ പ്രധാനമന്ത്രി നരേന്ദ്ര മോഡിക്കൊപ്പം നീരവ് മോഡി ചിത്രത്തിന് പോസ് ചെയ്തത്. അരുൺ ജെയ്റ്റ്ലിയുടെ നേതൃത്വത്തിലുള്ള ഔദ്യോഗിക പ്രതിനിധി സംഘത്തിൽ അംഗമായ നീരവിനെ മാറ്റിനിർത്തി ചിത്രം എടുക്കാൻ നരേന്ദ്ര മോഡി തയ്യാറായില്ല. അവിടെയാണ് സത്യസന്ധത കാണേണ്ടത്. എത്ര വലിയ ക്രമക്കേട് നടത്തിയാലും സ്വന്തം നാട്ടുകാരാണ്. ആശ്ലേഷിച്ച് കൂടെനിർത്താനും ചിറകിനടിയിൽ ഒളിപ്പിക്കാനും താൻ തയ്യാറാണെന്ന വലിയ മനസ്സിന്റെ പ്രഖ്യാപനമായാണ് കാണേണ്ടത്. ഇതുപോലെ എത്ര നീരവുമാർക്കും ഒളിക്കാനുള്ള ഇടമുണ്ട് അതിമാനുഷന്റെ ചിറകിനടിയിൽ.  

നാൽപ്പത്തെട്ടു മണിക്കൂർകൊണ്ട് വിദേശത്തുനിന്ന് കള്ളപ്പണം തിരിച്ചുകൊണ്ടുവരുമെന്ന് പറഞ്ഞ് അധികാരത്തിലേറിയ കാര്യം മോഡിജി ഇപ്പോഴും ഓർക്കാറുണ്ട്. കള്ളപ്പണം തിരികെ എത്തിക്കാൻ ചില തന്ത്രപരമായ നീക്കങ്ങൾ വേണ്ടിവരും. ദേശസ്നേഹികളായ നീരവ്‐ ലളിത് മോഡിമാരും വിജയ് മല്യയുമെല്ലാം കൂട്ടായി ശ്രമിച്ചാൽ അത് സാധിക്കും. അതിനെയാണ് ഇങ്ങനെ ആക്ഷേപിക്കുന്നത്.

വാജ്പേയിഭരണകാലത്ത് കാർഗിൽ യുദ്ധത്തിൽ മരിച്ച ജവാന്മാരെ കൊണ്ടുവരാനുള്ള ശവപ്പെട്ടി വാങ്ങിയതിൽ കമീഷൻ തട്ടി എന്നാണ് ചില ദോഷൈകദൃക്കുകൾ ആക്ഷേപിച്ചത്. അന്ന് ബിജെപി അധ്യക്ഷനായിരുന്ന ബംഗാരു ലക്ഷ്മൺ പ്രതിരോധ ഇടപാടുമായി ബന്ധപ്പെട്ട് നോട്ടുകെട്ട് കോഴയായി സ്വീകരിക്കുന്നത് ഒരു ചാനൽ പുറത്തുകൊണ്ടുവന്നു. കർണാടകത്തിലെ ഖനി കുംഭകോണം എതിരാളികൾ വലിയ കാര്യംപോലെ അവതരിപ്പിച്ചു. പെട്രോൾ പമ്പ് അഴിമതി എന്ന് വെറുതെ വിളിച്ചുപറഞ്ഞു. കോവളത്തെയും മുംബൈയിലെയുമെല്ലാം പ്രശസ്തങ്ങളായ ഹോട്ടലുകൾ വിറ്റഴിച്ച് അഴിമതി നടത്തി എന്നും അന്നു പറഞ്ഞു. അതെല്ലാം തിരുത്താനുള്ള ദൗത്യമാണ് മോഡി ഏറ്റെടുത്തിരിക്കുന്നത്. നാട്ടിലെ ഒരു പത്രവും മോഡിയെക്കുറിച്ച് മോശമായി എഴുതുന്നില്ല. അഴിമതിരഹിതഭരണം എന്നേ പറയുന്നുള്ളൂ. ചാനലുകൾ ഒരു മോഡിയെക്കുറിച്ചും ചർച്ച നടത്തുന്നില്ല.

അമിത് ഷായുടെ മകന്റെ കമ്പനിയുടെ അഭൂതപൂർവമായ വളർച്ച മോഡി നാട്ടിൽ കൊണ്ടുവരുന്ന വികസനത്തിന്റെ തെളിവാണ്. ബാല നരേന്ദ്രൻ മുതലയെ പിടിച്ചു എങ്കിൽ, അമിത് ഷായുടെ ബാലൻ ഒറ്റവർഷംകൊണ്ട് 16 ലക്ഷം ശതമാനം വളർച്ചയാണ്  നേടിയത്. ജയ് ഷായുടെ ടെംപിൾ എന്റർപ്രൈസസ് എന്ന കമ്പനിയുടെ വിറ്റുവരവ് നരേന്ദ്ര മോഡി പ്രധാനമന്ത്രിയായും അമിത് ഷാ പാർടി അധ്യക്ഷനായും തെരഞ്ഞെടുക്കപ്പെട്ടശേഷം 16,000 മടങ്ങാണ് വർധിച്ചത്. ഇത്തരമൊരത്ഭുതം മറ്റാർക്ക് സാധിക്കും. എന്നിട്ടും നരേന്ദ്ര മോഡിയെ തിരിച്ചറിയാൻ പലരും ശ്രമിക്കുന്നില്ല. അതാണ് ശരിക്കും ഇന്ന് ഇന്ത്യയുടെ പ്രശ്നം. 
................................................................................................
ആർഎംപി നേതാവ് രമയ്ക്കെതിരെ സാമൂഹ്യമാധ്യമങ്ങളിൽ കടുത്ത വിമർശം വന്നത് അവരുടെ രാഷ്ട്രീയത്തിന്റെ കുഴപ്പംകൊണ്ടാണ്. ടി പി ചന്ദ്രശേഖരന്റെ വിധവ, വനിത എന്നീ നിലകളിലല്ല രമ വിമർശിക്കപ്പെടുന്നത്. സിപിഐ എം വിരുദ്ധ രാഷ്ട്രീയം മാത്രം കൈമുതലാക്കി, കോൺഗ്രസും ലീഗും ബിജെപിയും പകർന്നുനൽകുന്ന ഊർജം ഭക്ഷിച്ച് സിപിഐ എമ്മിനെയും അതിന്റെ നേതാക്കളെയും തെറിവിളിക്കാനുള്ള ഉച്ചഭാഷിണിയായി രമ മാറിയപ്പോൾ ആർഎംപിക്കാർതന്നെ തിരിഞ്ഞുനിന്ന് തുടങ്ങി. യഥാർഥ വിപ്ലവപാർടി ക്വട്ടേഷൻസംഘമായി മാറുന്നത് കണ്ട് സഹിക്കാനാകാതെയാണ് മാറ്റങ്ങൾ. സമാധാനത്തിന്റെ മൊത്തവ്യാപാരികൾ സ്വന്തം ഓഫീസിൽ സൂക്ഷിച്ചത് വടിവാളുകളായിരുന്നു. മുല്ലപ്പള്ളിയുടെ തണലും തിരുവഞ്ചൂരിന്റെ സ്നേഹവും ഉള്ളപ്പോൾ പൊലീസ് ആർഎംപി ഓഫീസിൽ കയറില്ലായിരുന്നു. ഇപ്പോൾ കയറി: ആയുധം പിടിക്കുകയും ചെയ്തു. യുവാക്കളും മുതിർന്നവരും ഉൾപ്പെടെ ആർഎംപി വിടുന്നവരുടെ എണ്ണം നാൾക്കുനാൾ വർധിക്കുന്നു. പരിഭ്രമം ഉണ്ടാകും. അത് തീർക്കാൻ വെപ്രാളപ്പെടും. ആ വെപ്രാളം അക്രമവും അലമുറയുമായി പതിവുപോലെ രമ മാറ്റാൻ ശ്രമിച്ചു. കടലുപോലെ കിടക്കുന്ന സോഷ്യൽ മീഡിയയിൽ അതിന് രൂക്ഷപ്രതികരണങ്ങൾ വന്നു. ആർഎംപിയുടെ ആസ്ഥാന ഗായകർ അഴീക്കോടൻ രാഘവന്റെ വിധവയെയും കെ വി സുധീഷിന്റെ മാതാവിനെയുമാണ് ഭർത്സിച്ചത്? അത് കണ്ട് സഹിക്കാതെ ചിലർ രമയ്ക്കെതിരെ അതേനാണയത്തിൽ പ്രതികരിക്കാൻ ശ്രമിച്ചു.

സിപിഐ എമ്മിനെയും അതിന്റെ നേതാക്കളെയും തെറിവിളിക്കാം; പി മോഹനൻ മാസ്റ്ററെ കൊല്ലാൻ ആഹ്വാനംചെയ്യാം; എ കെ ജി സെന്റർ ആക്രമിക്കണമെന്ന് വിളിച്ചുപറയാം; രക്തസാക്ഷികളുടെ ബന്ധുക്കളെ അധിക്ഷേപിക്കാം. അതെല്ലാം ഉത്തമപ്രവർത്തനവും തിരിച്ചടികൾ 'സ്ത്രീവിരുദ്ധവും' ആകുന്നതെങ്ങനെ എന്ന് രമയ്ക്ക് വിശദീകരിച്ചുകൊടുക്കാൻ  ബി ആർ പി ഭാസ്കറിനെപ്പോലെ എന്തിനും മുതിർന്നവർ തയ്യാറായേക്കും എന്നാണ് കരുതേണ്ടത്. രമയെ എന്നല്ല, ഒരാളെയും തെറിവിളിക്കരുത്. അതാണ് ശരിയായ നിലപാട്. സ്വന്തം ശിങ്കിടികളെ രമ അടക്കിയില്ലെങ്കിലും സിപിഐ എമ്മുമായി ബന്ധമുള്ളവർ മിണ്ടാതിരിക്കുകയാണ് വേണ്ടത്. സിപിഐ എം വേഷമിട്ട് ചെങ്കൊടിയും ചെ ഗുവേരയുടെ ചിത്രവുമായി സോഷ്യൽ മീഡിയയിൽ നിരങ്ങുന്ന വ്യാജ പ്രൊഫൈലുകളുണ്ട്. അവയിൽ പലതും രമയുടെ ചങ്ങാതിമാരുടേതാണ്. അവരിൽനിന്ന് തെറി വാങ്ങി സിപിഐ എമ്മിന്റെ തലയിൽ വയ്ക്കാനുള്ള സൂത്രപ്പണിക്ക് കൂടുതൽ ആയുസ്സുണ്ടാകില്ല എന്ന് രമ വഴിയേ മനസ്സിലാക്കിക്കൊള്ളും

Top