19 December Wednesday

ചിരിച്ചു ചിന്തിയ്ക്കാന്‍ "വികൃതിവിശേഷങ്ങൾ'

വെബ് ഡെസ്‌ക്‌Updated: Wednesday Nov 21, 2018

കഥകളും കവിതകളും കൊണ്ട് സമ്പന്നമായ മലയാള സാഹിത്യത്തിൽ, ആക്ഷേപഹാസ്യ രചനകളുടെ എണ്ണം വളരെ കുറവാണ്. തന്റെ ചുറ്റുപാടും നടക്കുന്ന ഓരോ സംഭവങ്ങളിൽ നിന്നും ചിന്തയും ചിരിയും കണ്ടെത്തുക എന്നതും, അത് വായനക്കാരെ ചിന്തിപ്പിക്കുകയും രസിപ്പിക്കുകയും ചെയ്യും വിധം എഴുതി അവതരിപ്പിക്കുക എന്നതും  വളരെ ബുദ്ധിമുട്ടുള്ള ഒരു കാര്യമാണ്. വി കെ എൻ, സഞ്ജയൻ, വേളൂർ കൃഷ്ണൻകുട്ടി സുകുമാർ തുടങ്ങി അനേകം പ്രതിഭകൾ വാണ വേദിയാണത്. അത്തരം ഒരിടത്തേയ്ക്ക് ഒരു എഴുത്തുകാരൻ തന്റെ രചനകളുമായ് കടന്നുവരിക,  വായനക്കാർ അവയെ നല്ല രീതിയിൽ സ്വീകരിക്കുക ,അതൊരു ചെറിയ കാര്യമല്ല .

"വിരോധാഭാസൻ" എന്ന തൂലികാനാമത്തില്‍ "വികൃതിവിശേഷങ്ങൾ' എന്ന കൃതിയില്‍ അജി ചെയ്തിരിക്കുന്നതും അതാണ്. തന്റെ ചുറ്റുപാടുകളിൽ നിന്നും കണ്ടെത്തുന്ന സാമൂഹിക രാഷ്ട്രീയ വിഷയങ്ങളെ നർമ്മത്തിൽ പൊതിഞ്ഞ്  വികൃതിയോടെ എഴുത്തുകാരൻ നമ്മളിലേയ്ക്ക് നീട്ടുന്നു. അതിൽ നമ്മുടെ നാട്ടിലെ സാധാരണ ജീവിതം മുതൽ പ്രവാസംവരേയും സരസമായ വിഷയങ്ങളാകുന്നു. ഒറ്റ ഇരുപ്പിൽ ഒരു ചിരിയോടെ വായിച്ചു തീരുന്ന പുസ്തകം  വായനയ്ക്കുശേഷവും വായനക്കാർക്കൊപ്പം സഞ്ചരിക്കുന്നു. ചിരിയോടെ വായിച്ച ഓരോന്നിലും ഒളിഞ്ഞിരിക്കുന്ന ഗൗരവമായ സാമൂഹികവിഷയങ്ങൾ വായനക്കാരനെ  ചിന്തിപ്പിക്കുന്നു. 

"ചില ചന്തി ചിന്തകൾ" എന്ന ഏറെ വായിക്കപ്പെട്ട  ആദ്യ ആക്ഷേപഹാസ്യ പുസ്തകത്തിനു ശേഷം സൈകതം പബ്ളിക്കേഷൻ പുറത്തിറക്കിയ വിരോധാഭാസന്റെ  രണ്ടാമത്തെ പുസ്തകമാണ് "വികൃതിവിശേഷങ്ങൾ " പുസ്തകങ്ങളുടെ ഉത്സവമായ ഷാർജ അന്താരാഷ്ട്ര പുസ്തകോത്സവത്തിൽ വെച്ച്,  ശ്രീമതി.സബീന എം സാലി, ശ്രീ. സി.പി വെള്ളിയോടൻ, .സംഗീതാ ജസ്റ്റിൻ തുടങ്ങിയവർ പങ്കെടുത്ത ചടങ്ങിൽ എം.എ ബേബി പുസ്തകം പ്രകാശനം ചെയ്തു.

 സൈകതം ബുക്സ്.(+91 95390 56858) ആണ് പ്രസാധകര്‍. ₹വില:- 160

 


പ്രധാന വാർത്തകൾ
Top