22 September Saturday

കോർപറേറ്റ് രാജിലേക്ക്

പ്രൊഫ. കെ എൻ ഗംഗാധരൻUpdated: Tuesday Jan 30, 2018


ഫെബ്രുവരി ഒന്നിനാണ് കേന്ദ്രബജറ്റ്. ഒരു കൊല്ലം കഴിഞ്ഞാൽ പൊതുതെരഞ്ഞെടുപ്പായി. സ്വാഭാവികമായും തെരഞ്ഞെടുപ്പ് ലക്ഷ്യംവച്ചുള്ള പ്രഖ്യാപനം ബജറ്റിലുണ്ടാകും. അതേസമയം സർക്കാരിനെ നയിക്കുന്ന കോർപറേറ്റുകളെ പ്രീതിപ്പെടുത്തുന്ന നടപടികളും. ബജറ്റ് അവതരിപ്പിക്കുന്ന സാഹചര്യത്തിന് ഒരു പ്രത്യേകതയുണ്ട്. ഖജനാവ് സമ്പന്നമല്ല. രണ്ട് പരിഷ്കാരം, നോട്ട് നിരോധനവും ചരക്കുസേവന നികുതിയും സർക്കാരിന്റെ നികുതിവരുമാനം ചോർത്തി. അവശേഷിക്കുന്ന മാർഗം കടംവാങ്ങലാണ്. പക്ഷേ അതിന് പരിധിയുണ്ട്. വായ്പ, ദേശീയവരുമാനത്തിന്റെ 3.2 ശതമാനത്തിൽ കൂടാൻ പാടില്ല. അതനുസരിച്ച് 546532 കോടി കടംവാങ്ങാം. പക്ഷേ ഇപ്പോൾത്തന്നെ 612105 കോടി രൂപയായി. അതായത് 112 ശതമാനം.

എക്സൈസ് തീരുവയായിരുന്നു കേന്ദ്രസർക്കാരിന്റെ മുഖ്യ നികുതി. അതാണ് ചരക്കുസേവന നികുതിയിൽ ലയിപ്പിച്ചത്. മുന്നൊരുക്കമില്ലാതെ അടിച്ചേൽപ്പിച്ചതിന്റെ ഫലം നികുതിപിരിവിൽ പ്രതിഫലിക്കുന്നു. 2017 ജൂലൈയിൽ 94063 കോടി രൂപ ലഭിച്ച സ്ഥാനത്ത് നവംബറിൽ ലഭിച്ചത് 80808 കോടി. ലാഭത്തിന്മേലുള്ള കോർപറേറ്റ് നികുതി 2018ൽ 30ൽനിന്ന് 25 ശതമാനമാക്കാമെന്ന് 2015ലെ ബജറ്റിൽ വാഗ്ദാനമുണ്ട്. ബജറ്റിനുമുന്നോടിയായി നടത്തപ്പെട്ട കൂടിയാലോചനയിൽ അക്കാര്യം മുതലാളി സംഘടനകൾ ധനമന്ത്രിയെ പ്രത്യേകം ഓർമിപ്പിച്ചു. 18 ശതമാനമാക്കണമെന്ന 'മിതമായ' ആവശ്യവും ഉന്നയിച്ചു. അടുത്ത വർഷം കോർപറേറ്റ് നികുതിവരുമാനത്തിൽ വർധന പ്രതീക്ഷിക്കേണ്ട എന്നർഥം. സാമ്പത്തികപ്രവർത്തനം അനുസരിച്ചാണ് നികുതിവരുമാനം. ദേശീയവരുമാനമാണ് സാമ്പത്തികപ്രവർത്തനങ്ങളുടെ പൊതു അളവുകോൽ. അതായത് ഉൽപ്പാദനം, വിതരണം, വിനിമയം, ഉപഭോഗം തുടങ്ങിയവ ഉയർന്നതോതിലാണെങ്കിൽ നികുതിവരുമാനം കൂടും. എന്നാൽ, രാജ്യത്തിന്റെ ദേശീയവരുമാനം വർധിക്കുന്നില്ല, താഴുകയാണ്. കഴിഞ്ഞ നാലുവർഷത്തെ ഏറ്റവും താഴ്ന്ന നിരക്കിലാണ് ഇക്കൊല്ലത്തെ ദേശീയവരുമാനം. സാമ്പത്തികവർഷത്തിന്റെ ആദ്യത്തെ മൂന്നുമാസം (ഒന്നാം പാദം) 5.7 ശതമാനമായിരുന്നു വർധന. രണ്ടാംപാദത്തിൽ 6.3 ശതമാനമായി. ഗവൺമെന്റും മാധ്യമങ്ങളും അക്കാര്യം നന്നായി ആഘോഷിച്ചു.

നോട്ട് നിരോധനത്തിന്റെയും ചരക്കുസേവന നികുതി പരിഷ്കാരത്തിന്റെയും പ്രത്യാഘാതങ്ങളെ രാജ്യം തരണംചെയ്തു എന്നായി പ്രചാരണം. കഴിഞ്ഞവർഷം രണ്ടാം പാദത്തിൽ 7.5 ശതമാനമായിരുന്നു വർധന എന്ന വസ്തുത വിസ്മരിക്കുകയുംചെയ്തു. ഇനി മുൻവർഷെത്ത കണക്കെടുത്താലോ? കേന്ദ്ര സ്ഥിതിവിവര കണക്ക് സംഘടന ജനുവരി അഞ്ചിന് ആ കണക്ക് പ്രസിദ്ധപ്പെടുത്തി. അതുപ്രകാരം ആദ്യത്തെ ആറുമാസത്തെ വർധന ആറ് ശതമാനം. തുടർന്നുള്ള ആറുമാസത്തെ പ്രതീക്ഷ ഏഴ് ശതമാനം. കേവലം പ്രതീക്ഷയാണ്. സഫലമായാൽ(?) സാമ്പത്തിക വർഷം 6.5ശതമാനം വളർച്ചനേടും. സമീപകാലത്തെ ഏറ്റവും താഴ്ന്ന വളർച്ചനിരക്ക്! 2014‐15ൽ 7.2 ശതമാനം; 2015‐16ൽ 7.9 ശതമാനം, 2016‐17ൽ 7.1 ശതമാനം എന്നിങ്ങനെയായിരുന്നു വളർച്ചനിരക്ക്.

കുറഞ്ഞ വളർച്ചനിരക്കായിട്ടും രാജ്യത്തെ ഓഹരിവിപണി ഊർജസ്വലമാണ്. താഴ്ന്ന ദേശീയവരുമാന വളർച്ചനിരക്കാണെന്ന് കേന്ദ്ര സ്ഥിതിവിവരക്കണക്ക് സംഘടന തെളിവുസഹിതം സാക്ഷ്യപ്പെടുത്തുമ്പോഴും, ഇന്ത്യയുടെ സാമ്പത്തികവളർച്ച മുന്നോട്ടാണെന്ന് അന്താരാഷ്ട്ര ധനസ്ഥാപനങ്ങളും റേറ്റിങ് ഏജൻസികളും ആണയിടുന്നു. അതിന് കാരണംതേടേണ്ടത് ധനമൂലധനത്തിന്റെ ലാഭക്കൊതിയിലാണ്. ധനമൂലധനം ലാഭം തേടിയുള്ള നിരന്തരസഞ്ചാരത്തിലാണ്. ഇന്ത്യയിൽ ലാഭം കിട്ടുന്നിടത്തോളം ഇന്ത്യയിൽ തങ്ങും. അല്ലെങ്കിൽ മറ്റൊരിടത്തേക്ക്. ഇപ്പോൾ ഇന്ത്യയിലെ ഓഹരികളിലും കടപ്പത്രങ്ങളിലും നിക്ഷേപിക്കുന്നതാണ് ലാഭകരം. അതുകൊണ്ട്  ഇന്ത്യയിലേക്ക് ധനമൂലധനം ഒഴുകിയെത്തുന്നു. സർക്കാർ ആവശ്യമായ പ്രോത്സാഹനം നൽകുന്നു. പത്തുവർഷം കാലാവധിയുള്ള ഇന്ത്യൻ കടപ്പത്രം 7 ശതമാനം പലിശ നൽകും. അമേരിക്കയിൽ കിട്ടുന്നത് 2.3 ശതമാനം. ഇന്ത്യൻ ഓഹരിവിലകൾ ഉയർത്തി ആകർഷണീയമാക്കി നിർത്തേണ്ടത് ധനമൂലധനത്തിന്റെ ആവശ്യമാണ്. അതിനവർ ഓഹരിവ്യാപാരത്തിൽ സജീവമായി ഇടപെടുന്നു.  ഇന്ത്യയുടെ ദേശീയവരുമാനം ഇടിഞ്ഞാൽ അത് ഓഹരി കമ്പോളത്തെയും ധനമൂലധനത്തിന്റെ ലാഭത്തെയും പ്രതികൂലമായി ബാധിക്കും. അതിനാൽ അന്താരാഷ്ട്ര ധനസ്ഥാപനങ്ങളും റേറ്റിങ് ഏജൻസികളും വളർച്ചയെ ഘോഷിച്ചുകൊണ്ടേയിരിക്കും.   ഫലമോ? ഒരുവശത്ത് സമ്പത്തികസ്ഥിതിയുടെ പിന്നോട്ടടി; മറുവശത്ത് ഓഹരിവിപണിയുടെ കുതിച്ചുചാട്ടം!

ഓഹരിവിപണിയുടെ ഊർജസ്വലത രാജ്യത്തെ കോർപറേറ്റുകളെ നന്നായി രസിപ്പിക്കുന്നുണ്ട്്. രണ്ട് നേട്ടങ്ങളുണ്ടവർക്ക്.  ഓഹരി വിൽപ്പനയിലൂടെ കൂടുതൽ മൂലധനം സമാഹരിക്കാം. ഒപ്പം ഓഹരി മൂല്യത്തിലെ വർധന കോർപറേറ്റുകളുടെ ആസ്തിയും ലാഭവും വളർത്തും. 2017 ജനുവരിയിൽ ഓഹരിവില സൂചിക 27376 ആയിരുന്നു. 2018  ജനുവരിയിൽ 34844 ആയി വർധിച്ചു. അതനുസരിച്ച് ശതകോടീശ്വരന്മാരുടെ ആസ്തിയും. മുകേഷ് അംബാനിയുടെ ആസ്തി കഴിഞ്ഞവർഷം 17.50 ശതകോടി ഡോളറായിരുന്നു. ഇപ്പോൾ 40.20 ശതകോടി ഡോളർ. 76.90 ശതമാനം വർധന. ഗൗതം അദാനിയുടെ ആസ്തി 119.60 ശതമാനം വർധിച്ചു. സമകാലീന ഇന്ത്യ നേരിടുന്ന ഏറ്റവും പ്രധാന പ്രശ്നം വർധിച്ചുകൊണ്ടിരിക്കുന്ന സമ്പത്തികാസമത്വമാണ്. സാമ്പത്തികാസമത്വം ദാരിദ്ര്യം വളർത്തുന്നു. വിപണി ചുരുക്കുന്നു. വിൽപ്പന താഴ്ത്തുന്നു, ഉൽപ്പാദനവും തൊഴിലും ചുരുക്കുന്നു.  സാമ്പത്തികവളർച്ചയുടെ അടിസ്ഥാനമാണ് സ്വത്തിന്റെയും വരുമാനത്തിന്റെയും നീതിപൂർവമായ വിതരണം.

അസമത്വത്തെക്കുറിച്ച് തോമസ് പിക്കറ്റി, ലുക്കോസ് ചാൻസൽ തുടങ്ങി നൂറിലേറെ ഗവേഷകർ തയ്യാറാക്കിയ പഠനറിപ്പോർട്ടിൽ ഇന്ത്യയ്ക്ക് നൽകിയിട്ടുള്ള ഉപശീർഷകം 'ബ്രിട്ടീഷ് രാജിൽ നിന്ന് കോർപറേറ്റ് രാജിലേക്ക്' എന്നാണ്. സാധാരണക്കാർ അവരുടെ വരുമാനം പൂർണമായും നിത്യോപയോഗസാധനങ്ങൾ വാങ്ങാൻ ചെലവഴിക്കുമ്പോൾ, ധനികർ വരുമാനത്തിന്റെ വൻഭാഗം ആഡംബരപ്രധാനങ്ങളായ ഉപഭോക്തൃവസ്തുക്കളും സേവനങ്ങളും കൈക്കലാക്കാൻ ഉപയോഗിക്കുന്നു. രണ്ടും കുറഞ്ഞ തൊഴിൽശക്തിയേ ആവശ്യമാക്കുന്നുള്ളൂ. വൻകിട വ്യവസായങ്ങൾ മൂലധനസാന്ദ്രീകൃതമാണ്. വൻകിട വ്യവസായങ്ങളിൽ ഒരു രൂപ നിക്ഷേപിക്കുമ്പോൾ 0.04 തൊഴിൽ ഉണ്ടാകുന്നു. നിർമാണവ്യവസായത്തിൽ 1.1 തൊഴിലും വസ്ത്ര ഉൽപ്പാദനത്തിൽ 0.79ഉം തുകൽ വ്യവസായത്തിൽ 0.64 തൊഴിലും സൃഷ്ടിക്കപ്പെടുന്നു.

അത്തരം തൊഴിൽസാന്ദ്രതയുള്ള വ്യവസായങ്ങളെയാണ് നോട്ട് നിരോധനവും ചരക്കുസേവന നികുതിയും തകർത്ത് തരിപ്പണമാക്കിയത്. ബിഎസ്ഇ‐ സിഎംഐഇ സംയുക്ത പഠനപ്രകാരം, 2017 ജനുവരി തുടങ്ങി എട്ടുമാസം 26 ദശലക്ഷംപേർ പുതുതായി തൊഴിൽ തേടി. തൊഴിൽ ലഭിച്ചത് 1.5 ദശലക്ഷംപേർക്ക്.  പുതിയ ബജറ്റിലെ ഊന്നൽ കൂടുതൽ തൊഴിലവസരം സൃഷ്ടിക്കുന്നതിനാകണം. മേക്ക് ഇൻ ഇന്ത്യയും ഡിജിറ്റൽ ഇന്ത്യയും തൊഴിൽ വർധിപ്പിച്ചില്ല. വൻകിട വ്യവസായങ്ങളിലും വിദേശമൂലധനത്തിലും ഓഹരി കമ്പോളത്തിലും ഊന്നിയ സാമ്പത്തികനയം പൊളിച്ചെഴുതണം. ഗ്രാമീണ തൊഴിലുറപ്പ് പദ്ധതി ശക്തിപ്പെടുത്തണം. ചെറുകിട വ്യാപാരവും ചെറുകിട കാർഷിക‐ വ്യവസായ ഉൽപ്പാദനവും പരിപോഷിപ്പിക്കപ്പെടണം.

സമ്പദ്വ്യവസ്ഥയുടെ ഏറ്റവും ദുർബലവശമാണ് കൃഷിയും അനുബന്ധ തൊഴിലും. രാജ്യത്തെ തൊഴിലെടുക്കുന്നവരിൽ 50 ശതമാനം കൃഷിയെ ആശ്രയിക്കുന്നു. ദേശീയവരുമാനത്തിന്റെ 18.5 ശതമാനം കാർഷികമേഖലയിൽ നിന്നാണ്.  കയറ്റുമതി വരുമാനത്തിൽ 13 ശതമാനവും. കൃഷിക്കാർ പ്രഥമസ്ഥാനത്തേക്ക് ഉയർത്തപ്പെടുമ്പോഴേ കാർഷികവ്യവസ്ഥ സംരക്ഷിക്കപ്പെടൂ. കാർഷികമേഖലയിൽ 84 ശതമാനം നാമമാത്ര‐ചെറുകിട കൃഷിക്കാരാണ്. ഉയർന്ന ഉൽപ്പാദനച്ചെലവും കുറഞ്ഞ ഉൽപ്പന്നവിലയുമാണ് കർഷകരെ ആത്മഹത്യയിലേക്ക് തള്ളിവിടുന്നത്. കടം എഴുതിത്തള്ളൽ കൊണ്ടുമാത്രം കാർഷികമേഖല രക്ഷപ്പെടുകയില്ല. 

2022 ആകുമ്പോഴേക്കും കൃഷിക്കാരുടെ വരുമാനം ഇരട്ടിയാക്കുമെന്ന 2016ലെ ബജറ്റ് വാഗ്ദാനം ജലരേഖയായി. കഴിഞ്ഞ വർഷത്തെ കാർഷികവരുമാന വർധന 4.9 ശതമാനമായിരുന്നു.  ഈവർഷം കേവലം 2.1 ശതമാനം. സാധാരണക്കാരെ ദാരിദ്ര്യത്തിലേക്കു തള്ളിവിടുന്ന പ്രധാന ഘടകമാണ് താങ്ങാനാകാത്ത ചികിത്സാചെലവ്. ചികിത്സാചെലവിന്റെ 80 ശതമാനം ജനം സ്വയം വഹിക്കേണ്ടിവരുന്നു. ദേശീയവരുമാനത്തിന്റെ 1.4 ശതമാനമാണ് ആരോഗ്യമേഖലയിലെ പൊതുചെലവ്്. ചൈനയിൽ 10.6 ശതമാനം, അമേരിക്കയിൽ 8.3 ശതമാനം.

വിദ്യാഭ്യാസത്തിന് നീക്കിവയ്ക്കുന്ന പൊതുചെലവ് ഗണ്യമായി ഉയർത്തപ്പെടണം. ഇന്ന് വിദ്യാഭ്യാസത്തിന് ചെലവിടുന്നത് ദേശീയവരുമാനത്തിന്റെ 0.47 ശതമാനംമാത്രം. മൊത്തം സർക്കാർ ചെലവിന്റെ 3.65 ശതമാനമാണിത്. 71 ദശലക്ഷം വിദ്യാർഥികൾ ഉന്നതവിദ്യാഭ്യാസ മേഖലയ്ക്കുവെളിയിലാണ്. വിദ്യാഭ്യാസത്തിന് അർഹമായ പരിഗണന ബജറ്റിൽ ഉണ്ടാകണം

പ്രധാന വാർത്തകൾ
Top