Top
18
Saturday, November 2017
About UsE-Paper

സ്വകാര്യവല്‍ക്കരണത്തിന് കുറുക്കുവഴി

Saturday Nov 11, 2017
ഡോ. കെ കെ ദാമോദരന്‍

 

രാജ്യത്തെ സര്‍വകലാശാലകളിലെയും കോളേജുകളിലെയും അധ്യാപകരുടെ ശമ്പളം പരിഷ്കരിച്ചുള്ള ഉത്തരവ് കേന്ദ്ര മാനവവിഭവശേഷിവകുപ്പ് പുറപ്പെടുവിച്ചു. ആകെ 7.58 ലക്ഷം അധ്യാപകര്‍ക്ക് ഗുണം ലഭിക്കുമെന്നാണ് കേന്ദ്ര സര്‍ക്കാര്‍ പറയുന്നത്. 2016ല്‍ കേന്ദ്ര സര്‍ക്കാര്‍ പ്രസിദ്ധീകരിച്ച ദേശീയ ഉന്നതവിദ്യാഭ്യസ സര്‍വേ ഫലം അനുസരിച്ച് രാജ്യത്തെ ഉന്നതവിദ്യാഭ്യാസ സ്ഥാപനങ്ങളില്‍ ഏകദേശം 14,89,000 അധ്യാപകരാണുള്ളത്. ഇതില്‍ സ്ഥിരം അധ്യാപകരുടെ എണ്ണമാണ് മേല്‍സൂചിപ്പിച്ച 7.58 ലക്ഷം. ബാക്കിവരുന്ന പകുതി (49.1 ശതമാനം) താല്‍ക്കാലികക്കാരായ അധ്യാപകരാണെന്ന വസ്തുതകൂടി ആ പ്രസ്താവനയില്‍ അടങ്ങിയിട്ടുണ്ട്.

ഇന്ത്യയിലാകെ പരിഷ്കരണം നടപ്പാക്കാന്‍ 9800 കോടി രൂപ ചെലവുവരുമെന്നും അത് കേന്ദ്രം വഹിക്കുമെന്നുമാണ് 2017 ഒക്ടോബര്‍ 11ന്റെ കേന്ദ്ര ക്യാബിനറ്റ് തീരുമാനം. ക്യാബിനറ്റ് തീരുമാനത്തിന്റെ മഷിയുണങ്ങും മുമ്പുതന്നെ നേരത്തെ എടുത്ത നിലപാടില്‍നിന്ന് കേന്ദ്ര സര്‍ക്കാര്‍ പിന്മാറി. സംസ്ഥാനങ്ങള്‍ക്കുവരുന്ന ആകെ ചെലവിന്റെ 50 ശതമാനം 39 മാസത്തേക്ക് നല്‍കാമെന്നാണ് ഇപ്പോള്‍ പ്രഖ്യാപിച്ചത്. അതായത് പത്തുവര്‍ഷത്തേക്കുള്ളതിന്റെ 16.2 ശതമാനം. അതും 2016 ജനുവരി ഒന്നിന് നിലവിലുണ്ടായിരുന്ന സ്ഥിരം അധ്യാപകരുടേതുമാത്രം. ഈ തീയതിക്കുശേഷം നിയമിച്ച അധ്യാപകര്‍ക്കും അനുവദിച്ച തസ്തികകള്‍ക്കും വേണ്ട മുഴുവന്‍ പണവും സംസ്ഥാന സര്‍ക്കാരുകള്‍ കണ്ടെത്തണം. 1996-2006ലെ അഞ്ചാം പരിഷ്കരണത്തില്‍ ആകെ ചെലവിന്റെ 80 ശതമാനം അഞ്ചുവര്‍ഷത്തേക്ക് (അതായത് മൊത്തം ചെലവിന്റെ 40 ശതമാനം) മുന്‍കൂറായി സംസ്ഥാനങ്ങള്‍ക്ക് കൊടുത്തു. എന്നാല്‍, 2006-16ലെ ആറാം പരിഷ്കരണത്തില്‍, ആവശ്യമായ പണം ആദ്യം സംസ്ഥാനങ്ങളോട് മുടക്കാനും പിന്നീട് 40 ശതമാനം തുക കേന്ദ്രത്തോട് വാങ്ങാനുമായിരുന്നു  വ്യവസ്ഥ. വലിയ മുതല്‍മുടക്ക് ആവശ്യമുള്ളതിനാല്‍ സംസ്ഥാനങ്ങള്‍ അവയുടെ  സാമ്പത്തികസ്ഥിതി അനുവദിക്കുന്ന തരത്തിലുള്ള രീതികളാണ് നടപ്പാക്കാനായി സ്വീകരിച്ചത്. ഇതിന്റെ ഫലമായി മിക്ക സംസ്ഥാനങ്ങളിലും 2006 ജനുവരി ഒന്നിനുശേഷം പുതിയ അധ്യാപക തസ്തിക സൃഷ്ടിക്കാതിരിക്കുകയും ഒഴിവുള്ള തസ്തികകളില്‍ സ്ഥിരനിയമനം നടത്താതിരിക്കുകയും ചെയ്തു. കരാര്‍ നിയമനം മാത്രമാണ് നടന്നത്. കേന്ദ്രസഹായം 40 ശതമാനമായി കുറയ്ക്കുകയും സഹായം വൈകിപ്പിക്കുകയും ചെയ്തുകൊണ്ട്  20 വര്‍ഷം പിന്നിട്ടപ്പോള്‍, രാജ്യത്തെ ആകെ സ്ഥിരം അധ്യാപകര്‍ 50.9 ശതമാനമായി കുറഞ്ഞു. കുറച്ചുകൂടി കടുപ്പമുള്ള വ്യവസ്ഥകളും വെറും 16.2 ശതമാനം കേന്ദ്രസഹായവുമായി പത്തുവര്‍ഷംകൂടി മുന്നോട്ടുപോകുമ്പോള്‍ ഉന്നതവിദ്യാഭ്യാസരംഗത്തെ സ്ഥിരം അധ്യാപകരുടെ എണ്ണത്തില്‍ ഉണ്ടാകാന്‍ പോകുന്ന മാറ്റം ഊഹിക്കാവുന്നതേയുള്ളൂ. കോഴ്സുകളും തസ്തികയും അനുവദിക്കാതിരിക്കുകയോ സ്വാശ്രയ കോഴ്സുകള്‍മാത്രം അനുവദിക്കുകയോ ആണ് സംസ്ഥാനങ്ങള്‍ ചെയ്യുക. 1990നുശേഷം തമിഴ്നാട്ടില്‍ പ്രൈവറ്റ് എയ്ഡഡ് മേഖലയില്‍ ഒരൊറ്റ കോഴ്സും അനുവദിച്ചിട്ടില്ല. പകരം  അനുവദിച്ചതെല്ലാം  സ്വാശ്രയമേഖലയിലായിരുന്നു എന്നത് ശ്രദ്ധേയമാണ്.

ഏഴാം ശമ്പളപരിഷ്കരണത്തില്‍ മറ്റ് കേന്ദ്രജീവനക്കാര്‍ക്ക് നല്‍കിയപോലെ അധ്യാപകര്‍ക്കും 22 മുതല്‍ 28 ശതമാനംവരെ വര്‍ധന ഉണ്ടാകുമെന്നാണ് പ്രാഥമിക വിലയിരുത്തല്‍. വര്‍ധനയെ കുറച്ചുകാണുന്നില്ല. പക്ഷേ, ഈ ആനുകൂല്യം ആര്‍ക്കെല്ലാം ഏതളവില്‍ ലഭ്യമാകുമെന്ന കാര്യത്തിലേ സന്ദേഹമുള്ളൂ. മൂന്നുമാസത്തിനുള്ളില്‍ പ്രസിദ്ധീകരിക്കുന്ന റെഗുലേഷന്‍സാണ് അക്കാര്യം തീരുമാനിക്കുക. എന്നാല്‍, അതിനൊന്നും കാത്തുനില്‍ക്കാതെതന്നെ  അധ്യാപകരെ അധിക്ഷേപിക്കുന്ന തരത്തിലുള്ള മാധ്യമപ്രചാരണം തുടങ്ങിയിട്ടുണ്ട്.

1996 മുതല്‍ അധ്യാപകര്‍ക്കായി യുജിസി നിര്‍ദേശിക്കുന്ന പ്രതിഫല പാക്കേജ് മൊത്തത്തിലെടുത്താല്‍ ഏറെക്കുറെ ആകര്‍ഷണീയമാണ് എന്നത് വാസ്തവമാണ്. അത് അബദ്ധവശാലോ യുജിസിയുടെ അറിവില്ലായ്മകൊണ്ടോ സംഭവിച്ചതല്ല. ഏവര്‍ക്കും അറിയാവുന്നതുപോലെ തൊണ്ണൂറുകളില്‍ വിവരസാങ്കേതിക വ്യവസായത്തിലുണ്ടായ തൊഴില്‍സാധ്യതകളും കൂലിവര്‍ധനയും ചെറുപ്പക്കാരെയും മിടുക്കരെയും വലിയതോതില്‍ ആ രംഗത്തേക്ക്  ആകര്‍ഷിച്ചു. അധ്യാപകരായി ചേര്‍ന്ന പലരും ജോലി ഉപേക്ഷിച്ച് കൂടിയ ശമ്പളം തേടിപ്പോയി. ഉയര്‍ന്ന മാര്‍ക്കോടെ ബിരുദാനന്തരബിരുദവും ദേശീയനിലവാരമുള്ള യോഗ്യതാപരീക്ഷയും റിക്രൂട്ട്മെന്റ് ഏജന്‍സികളുടെ മത്സരപരീക്ഷയും അഭിമുഖവും തരണംചെയ്ത് കോളേജ് അധ്യാപകനാകാന്‍ മെട്രോ നഗരങ്ങളിലും വടക്കെ ഇന്ത്യന്‍ സംസ്ഥാനങ്ങളിലും ആള്‍ക്ഷാമം നേരിട്ടു. ആ സാഹചര്യം തുടര്‍ന്നാല്‍ അധ്യാപനരംഗം അധികം വൈകാതെ ശുഷ്കമാകുമെന്ന ആശങ്കയെതുടര്‍ന്നാണ് ധിഷണാശാലിയായ പ്രൊഫ. എസ് കെ തോറാട്ട് യുജിസി ചെയര്‍മാനായിരിക്കെ ജെഎന്‍യു മുന്‍ വൈസ് ചാന്‍സലര്‍ പ്രൊഫ. ജി കെ ഛദ്ധ ചെയര്‍മാനായി ആറാം ശമ്പള കമീഷനെ വയ്ക്കുന്നതും അത് 2008ല്‍ പ്രസിദ്ധീകരിച്ച ദീര്‍ഘവീക്ഷണത്തോടെയുള്ള ഈ നിര്‍ദേശങ്ങള്‍ സ്വീകരിക്കുന്നതും. ആ തീരുമാനം തീര്‍ത്തും ശരിയായിരുന്നു എന്ന് തെളിയിക്കുന്ന അനുഭവമാണ് പിന്നീടുണ്ടായത്.
എന്നാല്‍, 2006ലെ ശമ്പളപരിഷ്കരണത്തിന്റെ ഭാഗമായി 2010 സെപ്തംബറില്‍ പുറത്തിറങ്ങിയ റെഗുലേഷന്‍ രാജ്യത്തെ ഉന്നതവിദ്യാഭ്യാസ മേഖലയില്‍ നിലനില്‍ക്കുന്ന വസ്തുനിഷ്ഠസാഹചര്യങ്ങളെ പരിഗണിക്കാതെയുള്ളതാണ്. പ്രതിഭാശാലികളെ മടക്കിക്കൊണ്ടുവരിക എന്നതായിരുന്നു കമീഷന്‍ റിപ്പോര്‍ട്ട് ലക്ഷ്യമിട്ടതെങ്കില്‍, നിലവിലുള്ള ശരാശരിക്കാരെയെല്ലാം മടക്കി അയക്കുകയെന്നതായിരുന്നു റെഗുലേഷന്റെ ലക്ഷ്യം. അധ്യാപകരുടെ നവീകരണം ലക്ഷ്യംവച്ച് എന്ന വ്യാജേന റെഗുലേഷനില്‍ ഉള്‍പ്പെടുത്തിയ കരിയര്‍ അഡ്വാന്‍സ്മെന്റ് സ്കീം’ശമ്പളപരിഷ്കരണത്തിന്റെ എല്ലാ ശോഭയും കെടുത്തി. കോളേജുകളിലെ ഗവേഷണസൌകര്യങ്ങളുടെ കുറവും ഭൂമിശാസ്ത്ര പ്രതികൂലനവും പരിഗണിച്ച്് റെഗുലേഷനിലെ ഇത്തരം വ്യവസ്ഥകള്‍ മാറ്റണമെന്ന ആവശ്യം സംഘടനാഭേദം കൂടാതെ അഖിലേന്ത്യാതലത്തില്‍ എല്ലാവരും ഉന്നയിച്ചു. നാലുതവണ വ്യവസ്ഥകളില്‍ ഭേദഗതി വരുത്തിയെങ്കിലും നേരത്തെ സൂചിപ്പിച്ച ദുരുദ്ദേശ്യത്തില്‍നിന്ന് യുജിസി പിന്മാറിയില്ല. എതിര്‍പ്പുകളെ വകവയ്ക്കാതെ റെഗുലേഷന്‍ നടപ്പാക്കിയ സംസ്ഥാനങ്ങളിലെല്ലാം ഭൂരിപക്ഷം വരുന്ന ഗ്രാമീണ കോളേജുകളിലെ അധ്യാപകര്‍ പൊതുവിലും സ്ത്രീകളും സാമൂഹ്യമായി പിന്നോക്ക സാഹചര്യങ്ങളില്‍നിന്ന് വരുന്നവര്‍ പ്രത്യേകിച്ചും പരിഷ്കരണത്തിന്റെ തുടര്‍ ആനുകൂല്യങ്ങളില്‍നിന്ന് തഴയപ്പെട്ടു.

2016ലെ കണക്കനുസരിച്ച് ഉന്നതവിദ്യാഭ്യാസ മേഖലയില്‍ ആകെയുള്ള അധ്യാപകരില്‍ 76 ശതമാനം അസിസ്റ്റന്റ് പ്രൊഫസര്‍മാരും 13 ശതമാനം അസോസിയറ്റ് പ്രൊഫസര്‍മാരും 11 ശതമാനം പ്രൊഫസര്‍മാരുമാണ്. അസിസ്റ്റന്റ് പ്രൊഫസര്‍മാരും ഇതരവിഭാഗങ്ങളും തമ്മിലുള്ള അനുപാതത്തിലെ ഈ വലിയ അന്തരം 2010നുശേഷം രൂപംകൊണ്ടതാണ്. കേരളത്തില്‍ ഈ അനുപാതം ദേശീയ ശരാശരിയേക്കാള്‍ മോശമാണ്. സര്‍ക്കാര്‍മേഖലയിലുള്ള അധ്യാപകരില്‍ 85 ശതമാനവും അസിസ്റ്റന്റ് പ്രൊഫസര്‍മാരാണ്. ഏറെക്കുറെ ഇതേസാഹചര്യംതന്നെയാണ് എയ്ഡഡ് മേഖലയിലും. 2010 മുതല്‍ അസിസ്റ്റന്റ് പ്രൊഫസര്‍മാര്‍ ആരും അസോസിയറ്റാകുന്നില്ല. എന്നുവച്ചാല്‍ ആറാം ശമ്പള കമീഷന്റെ ഏറ്റവും വലിയ ആകര്‍ഷണമായ അസോസിയറ്റ് പ്രൊഫസര്‍ഷിപ്പിലേക്ക് മഹാഭൂരിപക്ഷം വരുന്ന അസിസ്റ്റന്റ് പ്രൊഫസര്‍മാര്‍ക്കും പ്രവേശിക്കാന്‍ കഴിയുന്നില്ല. ആറാം പരിഷ്കരണത്തിന്റെ ലക്ഷ്യത്തെത്തന്നെ അട്ടിമറിച്ച റെഗുലേഷന്‍ രാജ്യത്തെ യുവ അധ്യാപകരെ സംബന്ധിച്ചിടത്തോളം തീര്‍ത്തും നിരാശാജനകമായ സാഹചര്യമാണ് സൃഷ്ടിച്ചിട്ടുള്ളത്. 2010 മുതല്‍ നിലനില്‍ക്കുന്ന ഈ ദുരവസ്ഥ തുടര്‍ന്നാല്‍ മുമ്പ് സംഭവിച്ചതുപോലെയുള്ള കൊഴിഞ്ഞുപോക്ക് വീണ്ടുമുണ്ടാകും. ആദ്യം പോകുന്നത് മിടുക്കരായ ചെറുപ്പക്കാരായിരിക്കും. യുജിസി ലക്ഷ്യംവയ്ക്കുന്നതും അതാണ്. അധികയോഗ്യതയ്ക്കുള്ള പ്രോത്സാഹനമായി നല്‍കിയിരുന്ന എല്ലാ ആനുകൂല്യവും ഈ ശമ്പളപരിഷ്കരണത്തോടെ നിര്‍ത്തലാക്കിയതും ഈ ഉദ്ദേശ്യത്തോടെയാണ്. അങ്ങനെ കരാര്‍ അധ്യാപക നിയമനത്തിലൂടെ ചെലവുചുരുക്കലും സ്വാശ്രയ കോഴ്സുകളിലൂടെ സ്വകാര്യവല്‍ക്കരണവുമാണ് ലക്ഷ്യംവയ്ക്കുന്നത്. ഈ ഹീനശ്രമത്തിന് സാധാരണക്കാരന്റെ പിന്തുണ ലഭിക്കുന്നതിനാണ്  സര്‍വകലാശാല കോളേജ് അധ്യാപകരുടെ ശമ്പളത്തെ സംബന്ധിക്കുന്ന വ്യാജപ്രചാരണം ഉയര്‍ത്തുന്നത്. ഈ സാഹചര്യത്തില്‍ ശമ്പളപരിഷ്കരണത്തിന് ആവശ്യമായ മുഴുവന്‍ തുകയും കേന്ദ്രത്തില്‍നിന്ന് അനുവദിപ്പിക്കുന്നതിനും സര്‍വകലാശാലകള്‍ക്കും കോളേജുകള്‍ക്കും വെവ്വേറേ റെഗുലേഷനുകള്‍ രൂപപ്പെടുത്തുന്നതിനും ഉന്നതവിദ്യാഭ്യാസകാര്യങ്ങളില്‍ തീരുമാനമെടുക്കാനുള്ള സംസ്ഥാനങ്ങളുടെ അവകാശം സംരക്ഷിക്കുന്നതിനുമുള്ള സമ്മര്‍ദം സംസ്ഥാന സര്‍ക്കാരുകളില്‍നിന്ന് ഉയര്‍ന്നുവരേണ്ടതുണ്ട്. അത്തരം ശ്രമങ്ങള്‍ വിജയിക്കാത്തപക്ഷം ഉന്നതവിദ്യാഭ്യാസത്തിന്റെ സംഘാടനം സംസ്ഥാനങ്ങള്‍ക്ക് കടുത്ത വെല്ലുവിളിയാകും

(എകെജിസിടി ജനറല്‍ സെക്രട്ടറിയാണ് ലേഖകന്‍)