വിവാദസ്വാമി സന്തോഷ് മാധവനില്‍നിന്ന് തിരിച്ചുപിടിച്ച 25 ഏക്കറില്‍ ഇനി നെല്ല് വിളയും



കൊച്ചി> വിവാദസ്വാമി സന്തോഷ് മാധവനില്‍നിന്ന് സര്‍ക്കാര്‍ തിരിച്ചുപിടിച്ച 25 എക്കറില്‍ നെല്‍കൃഷിയിറക്കി. എറണാകുളം , തൃശൂര്‍ ജില്ലകളിലായി കിടക്കുന്ന പാടശേഖരത്തിലാണ് ഇന്ന് വിത്തിറക്കിയത്. നന്‍മ കര്‍ഷകകൂട്ടായ്മയാണ് വിത്തിറക്കിയത്. കൃഷിമന്ത്രി വി എസ് സുനില്‍ കുമാര്‍ ഞാറുനട്ട്  ഉദ്ഘാടനം ചെയ്തു. ഏഴ് വര്‍ഷങ്ങള്‍ക്ക് മുമ്പ് മിച്ച ഭൂമിയായി ഏറ്റെടുത്ത പുത്തന്‍വേലിക്കര, മാള മേഖലയിലെ നൂറ്റിപ്പതിനെട്ട് ഏക്കര്‍ സ്ഥലം കഴിഞ്ഞ സര്‍ക്കാര്‍ വിവാദ സ്വാമി സന്തോഷ് മാധവന്റെ കമ്പനിക്ക് തിരികെ നല്‍കിയത് വിവാദമായിരുന്നു. ഇതേ തുടര്‍ന്ന് സര്‍ക്കാര്‍ ഏറ്റെടുത്ത ഭൂമിയില്‍, തൃശൂര്‍ ജില്ലയില്‍പ്പെട്ട പാടശേഖരത്തിലാണ് നെല്‍കൃഷി ആരംഭിച്ചത്. തരിശ് ഭൂമികളില്‍ കൃഷിയിറക്കാനുള്ള എല്‍ഡിഎഫ് സര്‍ക്കാരിന്റെ പദ്ധതിയില്‍ പെടുത്തിയത്. തൃശൂരിനെ തരിശ് രഹിത ജില്ലയാക്കി മാറ്റുക എന്ന പദ്ധതിയുടെ ഭാഗമായി ഏറ്റവും കൂടുതല്‍ കൃഷിയിറക്കിയത് കൊടുങ്ങല്ലൂര്‍ നിയോജക മണ്ഡലത്തിലാണ്. വിത്ത് വിതരണ അതോറിറ്റി വഴി ഗുണമേന്‍മയുള്ള വിത്തുകള്‍ ലഭ്യമാക്കുമെന്ന് മന്ത്രി പറഞ്ഞു. സ്വകാര്യ ഏജന്‍സികളെ ഒഴിവാക്കി സമയ ബന്ധിതമായി വിത്തുകളെത്തിക്കാന്‍ അതോറിറ്റി പര്യാപ്തമായിക്കഴിഞ്ഞു. അടുത്ത ദിവസങ്ങളില്‍ ഉണ്ടായ വിത്ത് ക്ഷാമം ഒറ്റപ്പെട്ട സംഭവമാണെന്നും, ഇത് ഉടന്‍ പരിഹരിക്കപ്പെടുമെന്നും അദ്ദേഹം വ്യക്തമാക്കി. Read on deshabhimani.com

Related News