ബാബര്‍ ബാഹുലേയന്‍



ആരു പറഞ്ഞു ഇതുവരെ എഴുതിയതാണ് ചരിത്രമെന്ന്?. യഥാര്‍ഥ ചരിത്രം വരാന്‍ പോകുന്നതേയുള്ളു. സമീപഭാവിയില്‍ ഭാരതീയരായ നാം ഓരോരുത്തരും നിര്‍ബന്ധമായും പഠിക്കാന്‍ പോകുന്ന ചരിത്രത്തിന്റെ സാമ്പിള്‍ താഴെ. ഈ രചനയില്‍ സഹായിച്ച വിശ്വഹിന്ദു പരിഷത്ത്, ബജ്റംഗ ദള്‍, രാഷ്ട്രീയ സ്വയം സേവകസംഘം ശാഖകള്‍ എന്നിവയോടുള്ള നന്ദി രേഖപ്പെടുത്തുന്നു. ഇതിന് വേണ്ട രേഖകള്‍ തന്ന ഭാരതീയ ജനതാ പാര്‍ട്ടിയുടെ മണ്ഡലം കമ്മറ്റികളോട് ചരിത്രമുള്ള കാലത്തോളം ഈ ചരിത്രം കടപ്പെട്ടിരിക്കുന്നു. ഇനിയും പേര് പറയേണ്ട ധാരാളം പേരുണ്ട്. ഓരോരുത്തരുടെയും പേര് പറഞ്ഞ് അപമാനിക്കാന്‍ താല്‍പര്യമില്ലാത്തതിനാല്‍ അവര്‍ക്ക് വേണ്ടി പ്രത്യേക ജാഥ നടത്തി നന്ദി അറിയിക്കുന്നതായിരിക്കും. അതുവരെ ക്ഷമിക്കാനുള്ള വിശാല ഹൃദയം അവര്‍ക്കെല്ലാം ഉണ്ട് എന്നത് സുവിദിതമാണ്. ഇന്ത്യാ ചരിത്രം- പുനര്‍ വായന എന്നതാണ് ഈ പുസ്തകത്തിന്റെ പേര്. ശരിക്കും ഒരു പുനര്‍ വായന വേണ്ടിവരും വിധം ഇന്ത്യാ ചരിത്രത്തെ വളച്ചൊടിക്കുകയായിരുന്നു ഇതുവരെ. മതേതരവാദികള്‍ എന്ന ഒരു വിഭാഗം ഇന്ത്യയുടെ പൂര്‍വകാലത്തെ അവര്‍ക്കാവും വിധം നുണകൊണ്ടും ദുര്‍വ്യാഖ്യാനങ്ങള്‍ കൊണ്ടും വൃത്തികേടാക്കി. നമ്മുടെ നാട്ടില്‍ വ്യാപകമായി പരക്കുന്ന കെട്ടുകഥകളെയും ഐതിഹ്യങ്ങളെയും അവഗണിച്ചു.മന്ത്രവാദം, മഷിനോട്ടം, ജാതകം നോക്കല്‍, തകിട് ജപിച്ച് കെട്ടല്‍ എന്നീ ശാസ്ത്രീയമാര്‍ഗങ്ങളെ ഒട്ടും പരിഗണിച്ചില്ല. എന്നിട്ട് അവര്‍ ചെയതുകൂട്ടിയതോ?. മണ്ണ് കുഴിച്ച് കലങ്ങളുംപാത്രങ്ങളും കണ്ടെടുത്ത് അത് കൊണ്ട് ചരിത്രമെഴുതാന്‍ ഇരുന്നു. ഇക്കാലത്ത് ആരെങ്കിലും ചെയ്യുന്ന പണിയാണോ?. ഇവര്‍ക്ക് ചരിത്രമെഴുത്തോ, ആക്രിക്കച്ചവടമോ? .നാണയം, രേഖകള്‍ എന്നിവയൊക്കെ നോക്കിയാണത്രെ അവര്‍ വിധിനിര്‍ണയം നടത്തിയത്!. സഹതപിക്കുകയല്ലാതെ എന്ത് ചെയ്യും?. ഒരുകാലത്ത് കൊടുക്കല്‍ വാങ്ങലിന് ഉപയോഗിച്ച കാശ് നോക്കി ഇവര്‍ എന്ത് കുന്തം പറയുഞ്ഞെന്നാണ് കരുതുന്നത്!. ഇപ്പോഴത്തെ അഞ്ഞൂറിന്റെ നോട്ട് കയ്യില്‍ വെച്ച്തരാം. ഈ കേമന്മാര്‍ അത് നോക്കി ചരിത്രമൊന്ന് പറഞ്ഞുതരുമോ ആവോ?. കൂട്ടിലെ തത്തയെ കൊണ്ട് ചീട്ടെടുപ്പിച്ച് കൈനോട്ടക്കാര്‍ ഇതിലും നന്നായി ചരിത്രം പറഞ്ഞുതരും. അത്തരം ചരിത്രരചനകളെ പ്രോല്‍സാഹിപ്പേക്കണ്ടതിന് പകരം കുറെപ്പേരെ ഗവേഷകര്‍ എന്നും പറഞ്ഞ് ചില സര്‍വകലാശാലകളില്‍ തീറ്റിപ്പോറ്റുകയാണ്. തിന്ന ചോറിന് നന്ദിയില്ലാത്ത ഇവമ്മാര്‍ സര്‍ക്കാരിന് വല്ല പ്രശ്നവും വന്നാല്‍ കൂടെ നില്‍ക്കുമോ?. ഇല്ല. ചരിത്രകാരന്മാരാണത്രെ  ചരിത്രകാരന്മാര്‍!. അവരെഴുതിയ കപടചരിത്രത്തെ അടിമുടി മാറ്റി യാഥാര്‍ഥ്യത്തിലേക്കുള്ള ആദ്യചുവടുവെപ്പാണ് ഈ രചന. ശാസ്ത്രീയമായി ഈ രചന പൂര്‍ത്തിയാക്കാന്‍ എനിക്ക് അനുഗ്രഹമായി വര്‍ത്തിച്ച ജഗദീശ്വരനോടും ഞാന്‍ നന്ദി പറയുന്നു. രാജ്യസ്നേഹികള്‍ക്ക് വേണ്ടിയുള്ള ചരിത്രമാണ് ഇവിടെ എഴുതുന്നത്. മുഗള്‍ രാജാക്കന്മാരുടെ കാലം മുതലുള്ള ചരിത്രമാണ്  പുനര്‍വായനയ്ക്ക് ഒരുക്കിയിരിക്കുന്നത്. വെളുത്ത വാവിന് മാത്രം ഇത് വായിക്കുന്നതായിരിക്കും നല്ലത്. എങ്കില്‍ വാതരോഗങ്ങളില്‍ നിന്ന് മോചനം കിട്ടും. സൂര്യന്‍ അസ്തമിക്കുന്നതിന് മുമ്പ് ഇത് വായിക്കണം. വായിക്കുന്നതിന് മുമ്പ് കുളിച്ച് ശുദ്ധിവരുത്തണം. കിഴക്കോട്ട് തിരിഞ്ഞ് വായിക്കണം. ഒരു കാരണത്താലും തെക്കോട്ട് ദര്‍ശനമായി നിന്നോ ഇരുന്നോ വായിക്കരുത്. വിഘ്നങ്ങളുണ്ടാകും. അത്തം, ചിത്തിര, അനിഴം, തൃക്കേട്ട നാളുകാര്‍ ഇത് ചിങ്ങമാസത്തില്‍ വായിക്കുന്നത് ഉദ്ദിഷ്ടകാര്യസാധ്യതയ്ക്ക് ഉതകും. ഉത്രം, പൂരുരുട്ടാതി, പുണര്‍തം നാളുകാര്‍ക്ക് ഇത് വായിക്കാന്‍ നല്ലത് തുലാമാസമാണ്. എങ്കില്‍ ഉദ്യോഗക്കയറ്റത്തിന് സാധ്യതയുണ്ട്. ദോഷങ്ങള്‍ പരിഹരിക്കാന്‍ പുസ്തകം തുറന്ന് പതിമൂന്ന് പേജ് തള്ളി, പതിമുന്ന് വാചകം തള്ളി വായിക്കുക. അതില്‍ പരിഹാരനിര്‍ദേശമുണ്ടാകും. മുഗള്‍ ഭരണം സ്ഥാപിച്ചത് ബാബറാറെണന്ന് കാലാകാലങ്ങളായി വിശ്വസിക്കുന്നു. കൃത്യമായ എന്തെങ്കിലും തെളിവിന്റെ പിന്‍ബലത്തിലല്ല ഇത് പറയുന്നത്. അക്കാലത്തെ ജ്യോത്സന്മാരൊന്നും ഇങ്ങനെ ഒരു ബാബറിനെകുറിച്ച് സൂചിപ്പിക്കുന്നതേയില്ല. മാത്രമല്ല വേദങ്ങള്‍ ഇതിനെ കഷുറിച്ച് മിണ്ടുന്നതേയില്ല. വേദത്തില്‍ പറയാത്ത കാര്യങ്ങള്‍ വിശ്വസിക്കണമെന്ന് ഒരു രാജ്യസ്നേഹിയോട് പറയാന്‍ ഇവര്‍ക്കെങ്ങനെ ധൈര്യം വന്നു!. ശരിക്കും ഇത് അക്കാലത്ത് സംഭവിച്ച ഒരു അച്ചടിപ്പിശക് മാത്രമാണ്. മുഗള്‍ സാമ്രാജ്യം സ്ഥാപിച്ചത് ബാബറായിരുന്നില്ല. അത് ബാര്‍ബറായിരുന്നു. ബാര്‍ബര്‍ എന്നത് ബാബര്‍ എന്ന് അച്ചടിച്ച് വരികയും പിന്നീടുള്ള ചരിത്രകാരന്മാര്‍ ഉത്തരവാദിത്തബോധമില്ലാതെ അത് തുടരുകയും ചെയ്തു. ഹര്‍ഷവര്‍ധന രാജാവിന്റെ കൊട്ടാരത്തിലെ മുടിവെട്ടുകാരനായിരുന്ന ഒരു ബാഹുലേയനായിരുന്നു ഇത്. ശരിക്കും വയനാട്ടുകാരനായിരുന്നു. ഒരു വയനാട്ടുകാരന്‍ കാച്ചിയ എണ്ണയുമായി വടക്കോട്ട് വണ്ടി കയറിയെന്ന് അക്കാലത്ത് പ്രശ്നം വെച്ചതില്‍ നിന്ന് തെളിഞ്ഞിട്ടുണ്ട്.  ബാഹുലേയനാണ് അത്. നാട്ടില്‍ പണിയൊന്നുമില്ലാതെ ബുദ്ധിമുട്ടുകയായിരുനു ബാഹുലേയന്‍.  ബാഹുലേയന്റെ അമ്മാവന്‍ അക്കാലത്ത് ഡല്‍ഹിയില്‍ പട്ടാളത്തിലുണ്ടായിരുന്നു. അമ്മാവനാണ് ബാഹുലേയനെ ഡല്‍ഹിക്ക് കൊണ്ടുവന്നത്. ബാഹുലേയന് കാര്യമായ വിദ്യാഭ്യാസമൊന്നും ഇല്ലാതിരുന്നതിനാല്‍ നല്ല പണിയൊന്നും കിട്ടിയില്ല. അങ്ങനെയാണ് ഒരു ബിഹാറുകാരന്റെ കൂടെ കൂടി മുടിവെട്ടാന്‍ പഠിച്ചത്. അക്കാലത്താണ് ഹര്‍ഷവര്‍ധനന്റെ കൊട്ടാരംമുടിവെട്ടുകാരന്‍ ഗള്‍ഫിലേക്ക് പോയത്. അവിടെ ഒരു ഒഴിവ് വന്ന വിവരം അമ്മാവന്‍ അറിഞ്ഞു. ബാഹുലേയന്‍ അപേക്ഷ നല്‍കി. ഇന്റര്‍വ്യൂവില്‍ ബാഹുലേയനും ഹാജരായി. മലയാളിയായിരുന്നു ഇന്റര്‍വ്യു നടത്തിയത്. അയാള്‍ ബാഹുലേയനെ തെരഞ്ഞെടുക്കുകയായിരുന്നു. ഹര്‍ഷരാജാവിന്റെ കാലശേഷംപണി നഷ്ടപ്പെട്ട് അലയുകയായിരുന്ന ബാഹുലേയനെ സുല്‍ത്താന്മാരുടെ കാലത്ത് കുത്തബ് ദീന്‍ ഐബക്കിന്റെ  ആളുകള്‍ പിടിച്ചുകൊണ്ടുപോയി. ബാഹുലേയനെ കണ്ടപ്പോള്‍ സുല്‍ത്താന്‍ ഞെട്ടി. നല്ല ഉയരം, നല്ല ശരീരം. ബാഹുലേയനെ എവിടെ തടവിലിടും എന്ന ചിന്ത സുല്‍ത്താനെ അലട്ടി. നിലവിലുള്ള ജയിലൊന്നും പറ്റില്ല. അതിലൊന്നും ബാഹുലേയന്‍ ഒതുങ്ങില്ല. അങ്ങനെ ബാഹുലയനെ തടവിലിടാനാണ്  കുത്തബ് മിനാര്‍ പണിതത്. ബാഹുലേയന്‍ നല്ല പൊക്കമുള്ള ആളായിരുന്നു. ബാഹുലേയന്‍ പൂരുരുട്ടാതി പിറന്ന പുരുഷനായിരുന്നെന്ന് അക്കാലത്തെ ആര്‍ എസ് എസ് ശാഖയിലെ രേഖയില്‍ കാണാം. പൂരുട്ടാതി നക്ഷത്രത്തില്‍ ജനിച്ചവര്‍ പൊതുവെ നല്ല ഉയരമുള്ളവരും സമര്‍ഥന്മാരുമായിരിക്കും. അതുകൊണ്ടാണ് കുത്തബ് മിനാര്‍ നല്ല ഉയരത്തില്‍ പണിതത്. ഒരുകാരണവശാലും ബാഹുലേയന്‍ ജയില്‍ ചാടരുതെന്ന് സുല്‍ത്താന് നിര്‍ബന്ധമുണ്ടായിരുന്നു. സത്യത്തില്‍ ഈ കുത്തബ് മിനാര്‍ ഇടിച്ചു നിരത്തേണ്ടതാണ്. ഹിന്ദുവായ ബാഹുലേയനെ തടവിലിട്ട് പീഡിപ്പിക്കാന്‍ സുല്‍ത്താന്മാര്‍ പണിത ജയിലാണ് ഇത്. ഇതിനെ ചരിത്രസ്മാരകമായി കൊണ്ടുനടക്കുന്നത് നമ്മുടെ പാരമ്പര്യത്തോട് ചെയ്യുന്ന അനീതിയായിരിക്കും. കപടമതേതരവാദികളായ ചരിത്രകാരന്മാര്‍ അതിന്റെ രൂപഭംഗിയില്‍ ആവേശം കൊള്ളുന്നു. എന്നാല്‍ അതില്‍ നിന്ന് ഉയര്‍ന്നത് ഒരു ഹിന്ദുസഹോദരന്റെ ഗദ്ഗദങ്ങളാണെന്ന സത്യം മറക്കുന്നു. സുല്‍ത്താന് ബാഹുലേയനോട് ദേഷ്യം തോന്നാനുള്ള കാരണവും ബാഹുലേയന്റെ ആകാരം തന്നെ. അക്കാലത്ത് സുല്‍ത്താന്മാര്‍ പൂരുരുട്ടാതി നക്ഷത്രത്തില്‍ പിറന്നവരെ തെരഞ്ഞുപിടിച്ച് ശിക്ഷിച്ചിരുന്നതിന് നിരവധി രേഖകള്‍ വിശ്വഹിന്ദു പരിഷത്ത് ഗവേഷണം നടത്തി കണ്ടുപിടിച്ചിട്ടുണ്ട്. ബാഹുലേയന്‍ എതിരാളിയായി വരുമെന്ന് കണ്ട സുല്‍ത്താന്‍ ബാഹുലേയനെ പട്ടാളക്കാരുടെ കൈവശം പേര്‍ഷ്യയിലേക്ക് അയക്കുകയായിരുന്നു. അവിടെയും ബാഹുലേയന് പീഡനമായിരുന്നു. ബാഹുലേയനെ പീഡിപ്പിച്ച സ്ഥലമാണ് പിന്നീട് ബാബിലോണിയ എന്ന് അറിയപ്പെട്ടത്. പേര്‍ഷ്യയില്‍ വെച്ച് ബാഹുലേയനെ നിര്‍ബന്ധിച്ച് മതംമാറ്റി. ഇതിന്റെ നിരവധി തെളിവുകള്‍ ആര്‍ എസ് എസിന്റെ കൈവശമുണ്ട്. കൃത്യസമയത്ത് അവര്‍ അത് പുറത്ത് വിടും. സമയമാകട്ടെ, കാണിച്ച് തരാടാ... മതം മാറിയതിന്റെ മനഃപ്രയാസത്തില്‍ നീറുകയായിരുന്നു ബാഹുലേയന്‍. ബാഹുലേയന്‍ ബാര്‍ബര്‍ എന്നാണ് പേര്‍ഷ്യയില്‍ അറിയപ്പെട്ടത്. ബാഹുലേയനാകട്ടെ അത് തിരുത്താന്‍ പോയില്ല. അത് തന്ത്രപരമായിരുന്നു. ബാഹുലേയന്‍ പേര്‍ഷ്യയില്‍ ഒരു ശാഖ തുടങ്ങി. രഹസ്യമായായിരുന്നു ശാഖയുടെ പ്രവര്‍ത്തനം. കുട്ടികളെ സംഘടിപ്പിച്ച്  അവരെ ഡ്രില്ല് പഠിപ്പിച്ചു. അവര്‍ക്ക് നല്ല പരിശീലനം നടത്തി നല്ല കായികമികവുള്ളവരാക്കി. പ്രതികാരം ചെയ്ത് ഭാരതമാതാവിന്റെ മാനം കാക്കാന്‍ ബാഹുലേയന്‍ പേര്‍ഷ്യയില്‍ നിന്നും പടനയിച്ച് ഡല്‍ഹിയിലേക്ക് വന്നു. ബാഹുലേയന്‍ ഡല്‍ഹിയിലെത്തിയപ്പോള്‍ അവസാന സുല്‍ത്താനാണ് ഇവിടെ ഭരിക്കുന്നത്. ഏത് സുല്‍ത്താനായാലും ബാഹുലേയനെന്താ!. അഭിമാനമല്ലെ വലുത്!. ബാഹുലേയന്‍ യുദ്ധം തന്നെ പ്രഖ്യാപിച്ചു. ബാഹുലേയന്‍ തിരിച്ചുവന്ന വിവരം അറിഞ്ഞ് ജനങ്ങള്‍ ആവേശഭരിതരായി. അക്കാലത്ത് ഡല്‍ഹിയില്‍ സിനിമ കാണാന്‍ പോയവര്‍ ദേശീയഗാനം പാടിയപ്പോള്‍ എഴുന്നേറ്റ് നിന്ന് ബാഹുലേയനോട് ഐക്യദാര്‍ഢ്യം പ്രഖ്യാപിച്ചു. അക്കാലത്തെ സിനിമാ നോട്ടീസില്‍ ഇതിന്റെ തെളിവുകളുണ്ട്. യുദ്ധം തുടങ്ങാന്‍ നല്ല സമയം കുറിക്കാന്‍ ഒരു ഭടനെ ബാഹുലേയന്‍ കേരളത്തിലേക്ക് വിട്ടിട്ടുണ്ടായിരുന്നു. അക്കാലത്തെ റെയില്‍വേ ഓഫീസിലെ രേഖയില്‍ ഒരാള്‍ കേരളത്തിലേക്ക് യാത്ര ചെയ്തതിന്റെ തെളിവുണ്ട്. ഇത്തരം തെളിവുകള്‍ മതേതരകപടചരിത്രകാരന്മാര്‍ അവഗണിച്ചു. തൃശൂരിലുള്ള ഒരു ജ്യോത്സ്യരെയാണ് അദ്ദേഹം കണ്ടത്. ആ സമയത്തിനനുസരിച്ചാണ് ബാഹുലേയന്‍ യുദ്ധം തുടങ്ങിയത്. അന്ന് ഡല്‍ഹിയില്‍ ഇറങ്ങിയ പത്രത്തിലെല്ലാം യുദ്ധം തുടങ്ങിയ വാര്‍ത്തയുണ്ടായിരുന്നു. ഇബ്രാഹിം ലോധിയും  ബാര്‍ബറിന്റെ സൈന്യവും തമ്മില്‍ ഏറ്റുമുട്ടുന്നു എന്നായിരുന്നു വാര്‍ത്ത. ബാര്‍ബറിന്റെ പട എന്നതിന് പകരം അന്ന് ദേശീയ പത്രത്തിലെല്ലാം ബാബറിന്റെ പട എന്നാണ് അച്ചടിച്ച് വന്നത്. യുദ്ധത്തിന്റെ തിരക്കിലായതുകൊണ്ട് ബാഹുലേയന് അത് തിരുത്താന്‍ കഴിഞ്ഞില്ല. പിന്നീട് തിരുത്താന്‍ ബാഹുലേയന്‍ ആവശ്യപ്പെട്ടെങ്കിലും ഇത്രനാളായി തിരുത്താത്ത് ഇനി തിരുത്താന്‍ കഴിയില്ല എന്നാണ് പത്രങ്ങള്‍ അറിയിച്ചത്. അവര്‍ തിരുത്ത് കൊടുത്തില്ല. അക്കാലം ദേശീയ മാധ്യമങ്ങള്‍ കപടമതേതരവാദികളുടെ ആധിപത്യത്തിലായിരുന്നു. പാനിപ്പത്ത് യുദ്ധമെന്നും കപടമതേതരചരിത്രകാരന്മാര്‍ പറയുന്നത് അബദ്ധമാണ്. അവര്‍ പറയുന്നത് ഡല്‍ഹിയില്‍ നിന്ന് 60 കിലോ മീറ്റര്‍ അകലെയുള്ള സ്ഥലമാണ് ഇതെന്നാണ്. അത് ശരിയായിരിക്കും. പക്ഷെ പാനിപ്പത്ത് യുദ്ധമെന്ന് വിളിക്കാനുള്ള കാരണം അതല്ല. യുദ്ധത്തിനിടയില്‍ ബാഹുലേയനെ കണ്ട ഇബ്രാഹിം ലോധി 'വെള്ളം..വെള്ളം' എന്ന് പറഞ്ഞു. വെള്ളത്തിന് പാനി എന്നാണ് ഹിന്ദി. പത്ത് ഗ്ളാസ് വെള്ളമാണ് ഇബ്രാഹിം ലോധി കുടിച്ചത്. അതുകൊണ്ടാണ് 'പാനിപ്പത്ത്' എന്ന പേരുണ്ടായത്. മുഗള്‍ സാമ്രാജ്യം സ്ഥാപിക്കുന്നത് ശരിക്കും ബാഹുലേയനാണ്. ഇത്തരം യാഥാര്‍ഥ്യങ്ങളെ കാണാതെയാണ് കപടമതേതരചരിത്രകാരന്മാര്‍ വളച്ചൊടിച്ചത്. താജ് മഹല്‍, ചെങ്കോട്ട, ഫത്തേപ്പൂര്‍ സിക്രി എന്നിവയെ കുറിച്ചും ഇമ്മാതിരി സത്യങ്ങളുണ്ട്. അതും ഉടനെ പുറത്തുവരും. ഭാരതം ജയിക്കട്ടെ.   Read on deshabhimani.com

Related News